【抗爭半年】
【本報訊】由初夏走到寒冬，六個月前的今天，「200萬+1」港人上街，成功拉倒惡法，但五大訴求其餘四項仍然落空。參與抗爭運動者眾，各人帶着不同記憶、想法。回顧可讓我們從錯誤中吸取教訓；重整令人可能從經歷裏找到出路。本報邀請四位運動參與者，包括民陣召集人岑子杰、立場新聞副採訪主任陳朗昇、前線勇武抗爭者Coffee（化名）及後勤家長陳爸爸對談，從這半年記憶說起，再談和勇合一、警暴及運動的未來下一步。
記者：黃頌恩 歐陽聯發 陳珏明
記者：記
岑子杰：岑
陳朗昇：昇
Coffee：C
陳爸爸：陳
【回顧】7.1成轉捩點 邊做邊調整學習
岑：民陣喺運動入面角色不停改變，6.9之前我夠膽講民陣係一個大台，因為社會冇其他聲音或想像。去到6.9，夜晚已經有人同民陣講，唔好行完就散，但民陣有責任解散遊行，於是我哋不停諗，係咪可以用其他方式提示人逃生路線，等要走嘅走，留低嘅留。運動入面好多唔係民陣原本嘅支持者，於是我覺得要改改民陣角色。
陶輝（被指6.12當日下令清場的現場指揮官）條仆街將催淚彈直射我哋，仲話全個金鐘都係暴動，呢日後我覺得民陣有個好大改變，只係運動嘅參與者，主要係號召和理非嘅人同盡量招攬更多淺藍。再後面運動打嘅時候，民陣又多咗個角色，講畀藍絲聽我哋點解反對政府，記者好鍾意問我啲手足咁做點睇，6.12開始已經叫我割，但佢哋係受壓迫一群，點解落井下石？所以傳媒知我由6.12已經選擇咗唔割席，冇理由林鄭坐喺度然後我幫佢打人㗎嘛，當我戇X嘅咩。
陳：後勤家長係好特別嘅，為咗去支持前線勇武先至會有呢班家長。我哋一開始係連登度嚟，連登有排突然話前線尤其啲小朋友，可能中學生真係冇嘢食，或者俾屋企趕出嚟，就話要用個字叫「助養」啦，跟住有啲助養group，我哋自己再拆細搞咗個自己嗰區，後來越嚟越多元化，一開頭係錢方面，後來越來越多唔同嘅嘢。
C：做前線，第一次出去應該係6.9，其實嗰日冇乜衝突，除咗夜晚煲底，我都係一個花生友，戴住個最普通外科口罩企喺煲底出面停車場食煙，跟住無端端幾隊防暴跟住噴噴噴，我瀨晒嘢，嗰下我先越行越前。之後6.12，往後幾場打得比較激嘅都有份，直到中大、理大後，受咗傷，就要唞。
講勇武有啲敏感，好多人有自己印象同價值判斷，淨係識衝好唔理智，我覺得因為大家唔同角色，有啲人會話勇武好不智，付出個人代價，甚至有人真係死咗、冇咗隻眼，咁就一世。追求民主，從來唔係短期內做到嘅嘢，但前線有班人覺得，咦？呢個角色啱我做，我係承受到，咁我咪做呢個角色。
立會宣言 Connect和勇
岑：我覺得唔係不智，只係運動初期，好多和理非唔明點解掟嘢……7.1係轉捩點，好明顯嘅代表係「你教我和平示威係冇用」，6.12如果唔係勇武手足包住立法會，靠民陣班和理非，班議員架小巴入咗去開會通過咗啦！我好明白和理非作用，係道德感召強，但即時效果唔掂，係幫社會補身嘅中藥，長期調理個意識形態，但真係醫病用抗生素㗎，仲食中藥？6.12好明顯見到你哋粒抗生素有效，去到7.1，大家就狂啪，將中藥擺埋一邊。
昇：（7.1）我仲問攻入去做乜？然後已經爆玻璃，喺正門泛民議員嗌唔好攻入去，當時全部記者都唔知點解大家要攻入去，覺得好戇居，又無會開，裏面又冇嘢，我喺毛孟靜側邊，佢話你哋唔好啦，暴動要坐10年監，嗰下自己好感動，見到你哋燈蛾撲火，好鍥而不捨。我都唔知會點，好擔心現場人士安危……點知警察走晒，其實肯定唔係空城計，因為地下有好多嘢食啱啱買返嚟，凍檸茶啲冰都未融。入咗去後，你哋係想彰顯個議會幾荒謬不濟，今日睇番立法會復番會，啲撥款又拎番嚟再通過，騎騎呢呢議案又返嚟，大家望到嗰對比，我認同7.1入立法會好amazing。
岑：係個好好範例勇武行動可以俾人知點解，令人明白我覺得好重要。純粹笑話，嗰日我哋睇住直播，你哋喺會議廳圍圈討論，大家話呢個係香港立法會史上，開嘅最民主一次議會會議。
昇：因為開完真係行動到，又唔會有分組點票將件事中和咗。
C：冇嘅，因為我哋唔識路。
昇：係啊？我企喺立法會會議廳前面，諗住你哋會入去，點解仲未見人，定係唔通你哋唔入去？後尾發覺原來你哋係唔識路。
陳：我諗大概7月中，一開始好單純等大家有飽飯食，冇飽飯仲要衝，大家喺公海搵班望落有心嘅人，我衝去報名。開始係諗金錢上支援，錢好重要，當佢哋冇地方住冇嘢食時，除咗錢，見到前線真係細個，有好多情感上需求，可能出去打後同啲戰友出生入死，或者見到自己戰友俾人拉咗、受傷，情緒波幅好大……家長其實好多，有啲真係純粹諗住出錢，有啲擺個心落去，陪佢哋傾偈……有啲媽媽級母愛氾濫，係煲埋湯一齊去飲。
「家長」煲湯湊狗 全方位支援
昇：但係近幾個月，中大理大啊，你哋個角色可能唔同，要成日安排家長車、救人，會唔會都做呢啲角色？
陳：分幾方面，行動前要安排住所，當日幫佢哋睇地圖、睇哨，或者諗撤離路線。好多頻道會報警察去到邊，專注提供畀嗰個小隊……家長有唔同角色，有啲望住地圖都係路癡，有啲好有母愛，有啲係金主，有錢到照顧埋佢哋點樣落場點樣走，之後情感支援，真係需要一個家長啲家庭溫暖，起碼有個大人聽佢講嘢畀意見，照顧佢，問吓佢默書幾多分，我都見過。
昇：嘩，真係家長！
岑：幫佢簽通告，簽成績表呀！
陳：補習呀……
C： 係囉，補習呢啲都多。
陳：今次講到後勤家長，其實係完全一個幾新穎嘅人種，唔係淨係和理非，我都同朋友傾過，知唔知家長係咩？佢話和理非，不過會揸車囉。
岑：我都以為係啊講真，對唔住。會唔會幫佢剪頭髮？
C：你諗得出嘅都有，剪頭髮呀，照顧隻狗啊，嗰啲都有。
陳：全方位支援！