求驗客手記：奧燒撐新疆敲碎玻璃心
央視封殺廠城戰

阿仙奴球星奧斯爾上周五喺自己嘅社交網頁鬧爆中國打壓新疆維吾爾人，搞到玻璃心又起，結果中央電視台周日即時封殺呢位土耳其裔德國球星，取消原定北京時間周一凌晨阿仙奴對曼城場英超大戰直播，改為錄播較早時間上演嘅狼隊對熱刺，認真小家！

今仍企硬停播NBA

奧斯爾之前喺社交網站上載咗兩張圖片，除咗有象徵疆獨嘅東突厥斯坦旗幟，公開聲援喺新疆嘅維吾爾族人，中國政府當然唔會放過佢，同佢效力緊嘅阿仙奴。其實對於封殺異見，中國政府可謂非常熟手，今次奧斯爾事件同NBA開季前嘅「莫利風波」大同小異。

今年10月初，火箭總經理莫利（Daryl Morey）喺twitter度發文支持香港民主運動，被中方批評提倡「港獨」，火箭喺中國亦受到連番打壓。NBA總裁阿當施華（Adam Silver）力撐莫利行使言論自由，拒絕道歉，就被形容為「同中方作對」。火箭同NBA就咁成為咗央視嘅封殺目標，騰訊同央視當時高調宣佈禁播NBA賽事，但騰訊冇耐就縮沙，將禁播範圍收窄到只限火箭嘅比賽，其他賽事就照播。至於央視就一直企硬，至今仍然唔播NBA比賽。

唔知係咪驚成為足球界嘅火箭，阿仙奴好冇骨氣咁即刻喺官方微博同奧斯爾「割席」，澄清奧斯爾個人觀點同球會完全無關，仲話兵工廠向來唔講政治。其實阿仙奴右閘比利連最近亦喺社交網站就英國脫歐鬧爆英國首相約翰遜，但阿仙奴會方完全冇理會。英國《衞報》就話兵工廠今次係怕冇咗中國市場，先出面澄清。

槍手割席網民唔受

不過阿仙奴就算咁樣割席，中國網民依然唔受，對於央視唔播阿仙奴對曼城場波，好多大陸網民都讚好，仲話阿仙奴只係喺微博同中文版官網澄清，冇喺英文官網發聲明，唔算道歉。香港網民就建議，如果大陸球迷真係咁愛國，不如以後都唔好睇英超，睇番中超算數喇。