抗爭運動可以持續動員，和勇合一被視為是關鍵因素，「核爆都唔割」已經不單是口號，但不同立場與位置，面對汽油彈、私了等爭議手法，又如何消化和理解？
昇：其實你哋啲行動，譬如掟汽油彈或者乜都好，有冇咩檢討呢？
C：好少現場做，去到現場個個都驚弓之鳥，檢討好難即場做；至於汽油彈，都始料不及，始終講咗好耐，嗰刻先知原來有比我更癲嘅人。火魔法由魚蛋革命開始，幾時有人話一定要做呢？係7.21後，跟住8月頭終於出現。
昇：我當時喺度，我呢啲老人家以前睇新聞，韓國都係咁掟，其實防暴啲衫有少少防火嘛，警察訓練係有火嘅，成日唔明點解佢哋咁緊張，其實都只係用嚟阻警察前進。
岑：用和理非態度睇，當第一支雞尾酒出現係好驚，心入面有個道德喜馬拉雅山，林鄭係窮兇極惡之首，盧偉聰、鄧炳強係罪魁禍首，佢哋都未被追究，我哋講咩其他追究？但有條底線就係傷人，對人命傷亡我冇辦法接受，無論係示威者定藍絲。呢件事和理非好受折磨，火魔法一開始掟建築物，大家會想像有日掟人，真係去到一段時間，見到永遠掟路障，用火焰牆阻差佬，或者掟佢前面，比較驚心係唔小心燒着記者，呢啲意外令我哋覺得個工具好危險，但後期對勇武前線有信心。但令我哋最辛苦係「叔一燒」，馬鞍山阿叔無論佢做咩都好，個傷害真係好大。
C：好多人對勇武有種幻想，甚至乎我身邊朋友鬧交，會講冇份出去冇得講，但勇武做嘢唔係百分百啱，不割席唔代表我哋唔認錯，不割席唔係話行最前一定大聲啲，機場件事就做得唔係幾好；火魔意義係撤退同裝修，咁耐以嚟就算爭議啲嘅私了，原意係提高佢胡作非為嘅成本，但有啲真係過咗火，有少少暴戾情緒主導。
岑：其實關於裝修我有個意見要改善，就係黨鐵，唔好郁啲殘疾人士升降機同殘疾人士閘口，因為殘疾人士要坐輪椅係要搭港鐵，當佢冇咗個升降機，想遊行都出唔到。
昇：私了嗰度我夠膽講完全知來龍去脈。因為執法不公嘛，我哋自己都試過，北角見住打人，四個人打，只係拉咗頭嗰個。
岑：第二個係荃灣二坡坊，兇手已經俾兄弟綁住咗，嗰陣仲好溫柔綁住冇郁佢，然後第二日睇新聞畀差佬放咗，你會明白嗰份憤怒。
昇：欣喜聽到話機場嗰日唔理想，大家嘅憤怒係明白嘅，但無論點，如果你一拳我一拳真係會打死人，真係用咗私刑打死咗佢，我接受唔到，唔想佢死之餘，都唔想大家做錯事。我哋直播見到速龍打到大家爆晒缸，影住佢唔能夠阻止，但一路講佢真係會放軟手腳，唔只幫示威者，都幫緊警察，希望佢唔好做得咁錯。就算執法不公，私了如果最尾打死人，我勸你不如算數，不公就不公，好過我哋去做錯事。
岑：其實和理非都係情緒主導，舒服啲係大家為裝修私了劃界線，大家真係需要畀個心理出口和理非，嗰種瀕臨崩潰嘅自責，和理非心入面有好大掙扎。
C：即使係勇武、前線，好多都理性，私了係點到即止。有錯就要認，勇武前線唔係大L晒。
猶豫私了手法 怕手足遭重罰
陳：講火魔，我反而覺得道德包袱冇咁重，純粹每次見到會覺得其他人會唔會唔接受？驚人接受唔到，會諗點幫佢哋解釋。有時都會落現場，唔夠膽行咁前，但都畀狗追過，見到黑煙心裏面覺得好安全，知係自己地頭，見到白煙會好驚，火魔係有安全感，我都幾肯定唔只我一個咁諗。
C：所以林鄭先係咁講和理非割啦講L咗四、五次。
岑：全民話圍理大嗰陣，我仲要揸住枴杖，周地都係火魔，我見到先知原來係咁樣。爆嘅時候好睇過國慶煙花，知道唔係掟人，我覺得冇嘢，嗰日仲好sweet，有前線走嚟同我講：「跛就咪L走出嚟啦，一陣打到過嚟救唔救你呀？咪以為係岑子杰就冇事，啲差佬癲㗎唔認人！」我覺得汽油彈同前線勇武嘅情緒係一樣，睇落好似好火爆，但裏面係藏有一種無限溫柔，知道其實唔係去攻擊你，而係去保護你。
C：同埋和理非應該擔心係以暴易暴，兩邊都升級，控制唔到啫。
岑：其實只係驚人受傷，純粹係驚人受傷，即係如果大家可以提升到一個時候，雙方嗰個受傷都係冇乜嚴重時，隨便啦。同埋好唔想前線被拉，因為好驚，見到個刑罰真係太重。