傅珮嘉和台灣老公的牛肉麵店，四間舖有三間都在「重災區」，沙田新城市廣場那間就不用說，既有克警亂入又不時遇着隔鄰的Starbucks「裝修」；另一間則在遊行必經的銅鑼灣鵝頸橋；灣仔地舖更加煙霧瀰漫……
「我諗每一個人見到一啲好烏煙瘴氣嘅嘢，個心都會揦住，我近排嘅心情直情覺得，好耐冇喊過，但係呢一段時間，情緒真係好down！」傅珮嘉說。
生意急跌固然令人焦急，但兩公婆的心意卻不變，「（老公）就係話公司咁多人，唔可以令佢哋失業囉！」台灣人重感情，待員工如家人，一個都不能少；只是香港業主大多絕情，最新消息是，灣仔店的業主堅拒減租，12月尾麵店要告別了。
當年唱《絕》起家的傅珮嘉，去年出續集都叫《絕望元年》，堪稱絕望代言人的她說：「我會覺得絕望到頂點嘅時候，你先可以重生嘅！尤其係香港人啦！」
所謂置諸死地而後生。
撰文：文嘉龍
攝影：林賓尼
香港人修復能力好強
灣仔店12月尾告別，面對減租冇情講業主，傅珮嘉說：「如果佢有更好嘅客人（租客），我哋都唔好阻人發達囉！可能大家緣份到咗呢一度，暫時關閉都希望可以唞吓氣，睇吓會唔會有更好嘅地方發展。」
小店要生存已經非常艱難，作為有膊頭老闆，更加不想員工失去飯碗，「我覺得全香港嘅人都suffer緊呢個問題，我唔會覺得我哋特別慘。我老公講過一樣嘢係好啱嘅，身為一個老闆要承擔好多嘢，幾感動係有一晚佢揸車，我哋返屋企嘅時候，佢喺架車度講，話公司咁多人，唔可以令佢哋失業！嗰一刻我聽到嘅時候，我就知道我冇嫁錯老公，係好感動嘅！知道原來佢嘅諗法同我係一致。」
傅珮嘉說，這半年來面對生意告急當然不開心，更難受是看見年輕人各種痛苦畫面，「我見到特別係小朋友或者年輕人嘅時候，我係好難受。我記得有一次我睇到一個好細個嘅妹妹仔，隻眼好似中咗彈（催淚煙），即係附近放彈，佢跟住喺度喊，我就覺得點解會咁樣呢，原來行出街係一件咁危險嘅事，我想像唔到我帶住一個小朋友出街嘅時候，會遇到呢一件事囉！所以我諗尤其見到啲年輕人同埋小朋友嘅時候，我會特別難受！」
作為母親，家中有個快將9歲兒子的傅珮嘉，自然感受特別多，「嗰啲人都係人哋嘅小朋友，我會諗如果有一日，呢件事情發生喺我身上，我嘅小朋友遇到呢啲事，我會點樣去面對，我諗我呢一刻都解答唔到，因為有時候連我自己都唔知睇到啲乜嘢，已經同細個學嘅嘢完全唔同，我都好hesitate（疑慮）嘅時候，更何況要我自己嘅小朋友去面對呢樣嘢，變咗我哋要好小心咁去教育佢囉！」
自言一向是較為悲觀的傅珮嘉，雖說由出道的《絕》到去年延續的《絕望元年》都屬慘情歌，但她相信絕望盡頭就有重生機會。「我會覺得絕望到頂點，你先可以重生！傷心盡頭，當你冇眼淚冇憤怒嘅時候，其實就會復原，我覺得尤其係香港人啦，香港人嘅自我修復能力都係好強！」
要一個男人離鄉別井
2009年傅珮嘉在台灣發展時遇上她的老公周思甫（Steven），2010年在微博公佈結婚兼有喜消息，結婚近十年，她的悲觀主義也漸漸被老公改變了。「自從我十年前遇到我老公，佢改變咗我好多，我以前堅信人嘅性格或者個性係冇辦法改變，但係自從同我老公一齊咗之後，其實人係可以改變，只係你想唔想改變！所以我𠵱家唔係好悲觀，我頭先都講，我好耐冇喊過啦，我以前係好容易就喊，𠵱家比較堅強，尤其做咗媽咪之後，我嘅小朋友出世，令我覺得我以前唔夠好，我都希望我可以成為一個更加好嘅人，某程度上呢一大一細嘅出現，徹徹底底改變咗我！」
回想初相識那一幕，傅珮嘉說諗起都覺得「娘」，「朋友介紹，但係彼此都唔係對方喜歡嘅類型，唔知點解就一齊咗……我應該係佢過往嘅女朋友入面，最普通嗰個，佢亦都唔係我喜歡嗰個模樣，但係唔知點解一齊咗之後，再進入結婚，其實我哋到𠵱家喜歡嘅嘢都唔一樣㗎，但係生活上面嘅態度係好夾嘅，夾嘅程度係佢唔需要講出嚟，我已經講咗佢想要講嘅嘢！」
婚後傅珮嘉沒有留在台灣，反而是老公搬過來香港由零開始，她說有時回想起來，也覺得自己有點自私。「我生咗小朋友之後差唔多一個月，我坐咗月一個月就返咗嚟香港，當時佢都有討論要留喺台灣定香港，不過可能一切嚟得太快，我突然間原來變咗做一個媽咪，我都唔知湊唔湊得掂佢！對於一個男人，佢要嚟一個地方，雖然好近啫，但佢嚟到係完全冇朋友，完全冇事業，當時我覺得我好自私地淨係諗到眼前嘅嘢，我冇諗到要一個男人離鄉別井啦，嚟到佢要點樣生存、點樣適應呢，我係完全冇諗過！」
本身在台灣有做餐飲經驗的老公，來港後早期在石塘咀由小麵檔做起，多年來專心打拼，也因為太專注事業，兩夫妻曾經歷小危機。「佢唔係一個好談情說愛嘅人，即係唔係好sweet talk嘅人，所以我喺佢身上係得唔到！（好悶？）直頭啦，我有時會話畀佢聽，點解你都唔同我講『我愛你』嘅、你都唔嗌我『老婆』嘅，佢會話畀我聽係因為好攰呀，壓力好大呀，咁我都想佢知我係想大家sweet啲，有多啲互動嘅人，久而久之唔講，咪造成咗大家好冷感囉，真係會冷感！」
終於有一次忍不住大爆發了，「大家都各自忙，我又去台灣成日飛，佢發展佢嘅事業，有一次我唔知邊條筋short起上嚟就火山爆發，我就同佢講，我講到喊晒，我話覺得好可惜，如果兩個人係因為一啲大家已經習慣咗嘅嘢，而忘記咗要去照顧對方嘅話，我話個仔都大啦，以後得我同你㗎咋，人哋點解會話『老伴老伴』，就係你係一路陪我到老嘅伴侶。因為嗰次之後，佢就覺得真係要改變囉，雖然佢𠵱家都有陣時都懶㗎，但係我會覺得我哋係經歷咗，我唔會覺得呢個係一個大危機囉！」
唱歌呢份工差唔多喇
這段夫妻小插曲，傅珮嘉將靈感寫進歌詞成為新歌《靜音模式》。其實今年是傅珮嘉出道二十年，本應在4月的時候會舉行紀念演唱會，但臨時被唱片公司「取消」，令傅珮嘉相當失落，「係好大打擊，坦白講我為咗呢件事係好難受㗎！」
傅珮嘉1999年簽約環球，以藝名高雪嵐出道唱《絕》彈起，翌年為張栢芝填詞的《星語心願》更獲得《香港電影金像獎》最佳電影歌曲，之後成為唱作人來回台灣發展，到2012年站上紅館為黃偉文的作品展唱出《絕》，再次喚起歌迷的集體回憶。
多年來被人說成紅歌不紅人，有否不甘心？「我只可以話我呢一類形嘅歌手，真係唔適合去簽公司囉，我覺得可能我一路都未遇到一間公司係好知道要點樣『做我』，自己去台灣反而開心好多，因為得同失都係自己，你唔會有任何嘅埋怨，我會覺得與其去等待，不如自己去發掘機會……啲記者可能亦都覺得我唔係好識做人，有啲記者𠵱家見返我都話，哎吔，你以前唔笑㗎，你以前好惡㗎！即係唔係咁容易親近囉，我又唔會好圓滑識得去討好別人，所以變成唔係好受大家特別歡迎嘅一類artist！」
再推出廣東歌，是她的情意結，「其實喺香港出返廣東歌都係一個情意結，呢個情意結係因為呢個係我屋企，我唔會唔鍾意自己屋企囉，但係唱國語歌去台灣係因為好自由，我真係可以做返自己，佢哋個market係容許我做自己，以舒服嚟講當然係台灣啦，但係喺台灣耐咗又會好掛住香港，始終香港係我得到關注最多嘅地方，得到最多機會嘅地方，你話自由度方面我會揀台灣，放鬆啲！」
最近與公司（耀榮文化）的合約終於完了，傅珮嘉今個月開始重獲自由，她說：「我一定唔會再簽公司，好肯定，因為其實我對於我嘅歌唱事業，呢一份工，差唔多㗎喇！我差唔多嘅意思係，我仲有一啲心願去完成埋佢啦！其實我𠵱家偏重都係老公同埋小朋友。（唔再出歌？）隨緣啦，我都唔會特登去強求！（以後唔再唱？）都有咁嘅可能！」
待明年開埋演唱會，心願圓了，傅珮嘉說，她人生有更大的舞台。「我記得有一次同阿Y（黃偉文）食飯，佢話點解你唔可以開心啲去做呢樣嘢，一年十二個月，你當攞三個月出嚟玩，其他你咪enjoy自己嘅life囉！𠵱家我開始明白佢講嘅呢一番說話，就係我唔想俾唱歌綁架咗自己。其實我要唱歌我有好多機會唱，我去cafe、我去一啲小型嘅Live house，其實都可以唱歌！𠵱家對我嚟講，呢樣嘢已經唔重要，反而我覺得人生個舞台，過去二十年都係唱歌，𠵱家我嘅舞台，我可以係幫我老公做餐廳，我可以係好好嘅媽媽，可以去學bakery，因為我自己好鍾意bakery，呢啲全部都可以係我嘅舞台嚟㗎！」
【後記】另類拍拖
訪問在區選之後兩天進行，傅珮嘉說：「呢幾日大家都終於開心返啦！」下個月，輪到她老公要回台灣投票了！Steven由西環開會趕回銅鑼灣店會合老婆，已經說得一口流利廣東話的Steven陪住老婆一起出鏡，表情帶點生澀，畢竟上鏡不及煮麵純熟。
40歲的傅珮嘉說：「我覺得陪伴佢做餐廳嘅嘢，其實對我嚟講係拍緊拖㗎，以前見唔到佢㗎嘛，𠵱家就由朝見到晚，所以呢個其實係一個另類嘅拍拖方式，我都覺得佢真正成為我心目中唔可以缺少嘅人！」
缺一不可。
場地提供：三星台菜食堂
