左丁山初入美資銀行做事時，美國聯邦儲備銀行主席叫做Arthur Burns，當時對國際金融認識麻麻，唔多認識呢位先生，到1981年左丁山已經係一間加拿大銀行之東南亞地區業務經理，去到東南亞見客，成日畀客戶問起美元利率、美元匯率等事情，於是加緊補習聯儲局知識，知道當年通脹高企，Burns退任，換上William Miller，Miller做一年就頂唔住，卡達總統改委任Paul Volcker（沃爾克）於1979年8月6日上任，1980年就有總統大選，卡達係希望沃爾克能夠克服高通脹（13％），為卡達連任創造良好環境。沃爾克有命在身，打擊通脹絕不手軟，接連加息。咁，卡達計錯數嘞，加息一定拉低經濟增長與股市指數，人民邊會歡喜，果然卡達就於1980年敗在共和黨候選人列根手上。列根照樣叫沃爾克打擊通脹，不干預沃爾克加息，於是到咗1981年7月，聯邦基金利率（Fed Funds Rate）高達22％，令到美國經濟陷入衰退，失業率高達10.8％（1982年年尾），通脹率呢？沃爾克上任時之11.8％下降至1986年年尾之1.2％，故此沃爾克在馴服通脹方面徹底成功，現在回想起來，佢嘅堅持規則作風，實在係固執到極，難得嘅係列根總統冇好似今日特朗普咁樣痛罵聯儲局主席鮑威爾。今日美國通脹率低於2％，失業率3.5％（五十年新低），Fed Funds Rate係介乎1.5％至1.75％之間，情況好過列根年代好多，但特朗普仍然施壓要鮑威爾減息，根本毫無道理。特朗普完全着眼競選時之政治利益，與卡達、列根兩位總統相比，自私到極。
左丁山人生第一次買樓供樓，就係在1981年年尾，港元按揭利率高達22％，現在講都無人信。次年1982年，有佳寧風暴，加上戴卓爾夫人去北京人民大會堂跌咗一跤，香港樓價大跌，左丁山變成負資產業主兼捱超高息按揭貸款，都唔記得點樣捱得過去了。一句話講晒，好彩當年冇失業，保住一份銀行工，有現金流（月薪）就可以撐到黎明。
見過沃爾克年代之高息高通脹，現在見到低息低通脹，甚至係負利率兼通縮，左丁山在大學修讀經濟學知識備受考驗。咁低息，人已退休，儲蓄存款完全唔可以養老，真麻煩也。沃爾克做聯儲局主席之經典圖片就係BBC刊出之「在國會聽證會咬大雪茄」，今日真係嚇親反吸煙人士，沃爾克食雪茄，成為生招牌，在現今美國反吸煙時代，沃爾克唔知逝世前戒咗煙未呢？沃爾克第二件事令人留下深刻印象嘅，就係佢不顧華爾街高薪吸引，以服務國家公眾為一生光榮，到華盛頓上任之後，成日食漢堡包當午餐，因為要慳錢供兒子上大學喎。