【地產專題】鄭小姐2017年斥資約655萬元買入新地（016）將軍澳日出康城晉海一個兩房單位，實用面積464方呎，呎價約1.4萬元，「住過長實樓，空間冇咁寬敞，有啲位呃秤，做唔到傢俬。聽阿爸阿媽講，呢間發展商（新地）好，本身對佢都有信心，而且睇到（晉海）單位四四正正，主人房擺到雙人床同衣櫃」。不過，在資深驗樓師詹濟南驗收下，除了拖累單位被扣10分的洗手盆邊漏水問題，有幾項設計引來詹Sir及業主批評，其中開放式廚房摺枱驚現「831」數值 ；業主為之氣憤，最終詹Sir評單位88分。
「工作平台唔知為乜」
回想收樓情況，鄭小姐表示，「先講開心嘢，景觀超乎預期，諗住對領都，點知望山又望海。但開放式廚房已佔個廳一半空間，擺唔到飯枱。苦惱咗兩年，單位點擺飯枱？每次諗到（唔知）飯枱點擺，就唔係好想搬入來。來到單位見到廚櫃拉出來嗰張唔知係side table定high table，就更苦惱」。
她又關注單位有否漏水問題，甚至親自測試主人房工作平台門邊是否漏風，因詹Sir教過「漏得風就漏得水」，「閂晒全屋門，露台邊工作平台門感到有風，咁嗰度我將來會整榻榻米，如果日後有雨水滲入嚟，比廳滲水仲大鑊」。她又認為：「工作平台都唔知為乜，對買家嚟講，可以唔需要，呢度計緊實用面積」。
到詹Sir驗收，看到開放式廚房的活動式摺枱板撞到崩花，他解說：「知唔知問題喺邊度？你推吓枱，慢慢推，係咪推過地磚罅就撠住？因為地磚夾口罅有高低，目前允許高低偏差一毫米，呢一毫米足以造成震動。我諗設計嗰陣冇諗到地面用木紋磚，呢啲咁嘅設計唔好，每次推枱都會撞擊，咁樣唔襟，相信一至兩年就玩完。」詹Sir又抽水：「呢張枱拉出拉入有少少唔順，發生乜事呢？度一度先，一邊闊836厘米，另一邊闊831厘米，8.31夾人死喎，啱啱有少少『啤把』（一邊闊一邊窄）。」
至於客廁洗手盆邊漏水，詹Sir以鋼片核查，「係走咗雞啦，成塊鋼片攝晒入去，通晒窿，實漏啦。多數裝完盆會唧口膠，有人就裝暗膠。但現在肯定唔係暗膠，係乜膠都冇」。他續稱，只是盆邊漏水，去水喉無漏，浴室亦無空心磚。而單位玻璃窗經他和徒弟康仔再三檢驗亦沒崩花，客廳地磚有一處少許空心，但不足全塊磚十分一，未算超標。詹Sir總結，一條膠累單位扣10分，加上鋪磚、廚櫃及油漆扣些微分數，單位驗樓得分88分。
評88分 業主後悔買入
業主鄭小姐聽完評分，認為廁所漏水問題應可解決，不過最失望是廚房摺枱，「我要自己搵人變返道門，呢個設計真係唔user-friendly，又唔會長時間拉出來用。寧願佢張枱高返少少，可以畀人坐喺度食飯」。她無奈稱：「佢哋（新地）特別以樓盤質素聞名，我先至唔介意畀一個貴啲價錢買呢度。以地理位置嚟講，由康城站行過來要10分鐘。如果唔係貪質素好，更加唔會買呢度，我寧願買近少少康城站嘅樓盤。（有少少後悔？）係呀。」
新地發言人回應稱已即時跟進所提出項目，除了一項更換工作預計於周日（12月15日）完成外，其他執修工作已完成，稍後將通知業主驗收。
