【本報訊】三年前揭發的荃灣石棺藏屍案，經歷過疑犯潛逃台灣及法官急病要解散陪審團等事件後，此宗駭人聽聞的殺人案終有裁決。案中自認「大話王」、成立犯罪組織「There」的大魔頭曾祥欣（阿T）謀殺罪成被判終身監禁，其兩名馬仔誤殺罪成待判。《蘋果》走訪各人的死黨及曾是「There」的成員，發現天生自卑狂的阿T，其成魔之路全因向一本以金錢掛帥為內容的漫畫「抄橋」，他為了做「金錢師」不惜偷呃拐騙，最終為錢踏上不歸路，由小丑變成殺人魔。
記者：郭美華 黃學潤 張軍 莊建鑫
本案三名主角包括主謀「阿T」曾祥欣（30歲）、兩名馬仔「阿豪」劉錫豪（24歲）和「阿K」張善恒（27歲），三人均被控謀殺，但只得阿T謀殺罪成。阿T昨日聽到裁決後木無表情；阿豪得悉謀殺罪不成立，雙手抓了頭髮一下，鬆一口氣，其後激動落淚；阿K聽到自己同樣謀殺罪脫，立刻面露笑容。阿T接着一直表情沉重。
好友：阿T呃呃𠱁𠱁扮大佬
阿豪和阿K最初認為阿T可以幫他們搵快錢和「黐金糠」，遂跟隨阿T並出席「There」聚會吃喝玩樂，後來發現他只是自吹自擂。跟阿T相交逾十年的「E臣」稱，是阿T邀請他加入「There」。E臣透露，二人因迷上同一款日本音樂街機Jubeat而在機舖認識，之後經常通宵「操機」成為好友，「佢（阿T）份人好低能、懶型！（有次）趁佢同女友傾電話，我哋就不停用公仔扑佢，好搞笑」。
不過由於阿T身形矮小兼樣貌不出眾，「佢得150厘米高，又哨牙，重度近視，所以好自卑，成日做啲小動作引人注意」，E臣透露，年輕時的阿T經常靠在朋輩間扮演小丑角色引人注目，更不時成為被戲弄對象，「打打吓機，佢會企喺電視前，我哋就的起佢，除佢底褲，玩happy corner囉！」
至於阿T的成魔之路，E臣稱阿T深受一本漫畫的理念影響，「（漫畫內容）講成班年輕人返工放工，一放工group埋一齊開party搵錢，佢一開始就話好想學金錢師咁，夜晚返工創業」。阿T遂開始靠「呃呃𠱁𠱁」為生，更成立聊天群組「There」與成員商討搵錢大計，E臣亦有加入。
最初組織只有數人，包括一對在飛鏢場認識的情侶和「阿J」（死者張萬里），阿T選址荃灣灰窰角街DAN6工廈單位即案發現場作為「基地」。阿T與阿J聲稱靠炒股搵錢，「佢同阿J輪更睇住個市，日頭阿J睇亞洲盤，夜晚就阿T睇歐美盤」。其間阿T更自稱曾代購一批美國便服賺得第一桶金100萬元，但根據阿T庭上口供，實情是阿T藉詞開設公司，詐騙一名大陸金主入股200萬元，與阿J各分100萬元。
其後阿T認識次被告劉錫豪、第三被告張善恒和何菱瑜（小草），四人一起搵快錢，「搞speed party、speed dating，快閃派對，話一晚賺一、兩萬！」當時他們租用一個空置單位舉辦快閃派對並提供酒水，男士收費800元，女士則酌量收錢，每次吸引40、50人參加。由於阿T頗具生意頭腦，加上經常有幾件名牌傍身，如LV褲、SUGARMAN鴨仔衫等，令阿豪和阿K對他產生崇拜感，決心追隨他，「佢（阿T）想扮大佬，想一team人起個圍爐，自己做策劃者，做最大嗰一位，叫組員做嘢，自己就攞功勞」。
其後E臣因工作忙碌甚少與阿T聯絡，直至2016年3月4日即案發當日凌晨1時許，突然收到阿K來電，「阿K平時好少打畀我，第一句說話『有個你好想見嘅人嚟咗』」。但當時E臣患上重感冒，吃藥後昏昏欲睡，故未有理會；直至翌日起床，才發現凌晨4時許阿K和阿T曾先後致電給他。
雖然外間批評三名被告是冷血殺人魔，但作為他們好友的E臣直言，至今仍不相信阿T夠膽殺人，「以前同佢去鬼屋玩都驚，點會夠膽殺人？」他不排除一切可能是意外，發生了突發事件，三人在慌亂下搞出事，慶幸自己當晚感冒無到場，「如果我真係上咗去就攬炒喇！」
另一名同樣認識阿T等三人的唐景成是在佔中運動時結識阿T，當時唐在深水埗黃金商場一間電子產品店當售貨員，他受訪時形容阿T性格奇怪，是名副其實的「吹水王」，「佢成日扮有錢，話有幾百億地皮傾緊，落到嚟呢樣嗰樣都話買啦買啦，但落嚟幾次只買過一次，其餘混吉多」。他說，雖然與三人並非好友，但感覺阿豪和阿K確像阿T跟班，「有次阿T帶阿豪、阿K落嚟舖頭介紹畀我識，話以後佢哋兩個會搵我買嘢，口吻成個大佬咁！」
性格火爆 阿豪不滿受擺佈
唐景成早前曾被傳召上庭，全因三人着草前一日，到其店內叫他協助打印入台證。他清楚記得當日為2016年3月10日，「佢（阿T）一抽二袋話去旅行，好似同班朋友we wa咁，完全冇異樣」。當時他還心想：「咁有錢，拎起passport話走就走，真係爽。」惟七日後他收到阿T的長途電話，「佢好輕鬆話：『同你講啲嘢吖，我啪咗人，有冇三千、四千蚊借嚟？』我話好窮，佢話：『得啦，我自己諗辦法啦。』語氣好輕鬆」。對於「朋友」（阿J）被殺害，三人仍若無其事，唐直言感到心寒。
阿T前女友阿Yan亦謂男友是個「大話王」，「成日扮有錢，次次出街食飯就有藉口唔畀錢，成日向朋友偷呃拐騙」。她亦被對方利用其名字借約30萬元，其後阿Yan提出分手，阿T仍死纏爛打，拖拉半年才正式斬纜。
被指殺人後仍無動於衷，翌日更出發到新加坡參加跳舞比賽的阿豪性格火爆，常飲醉酒及試過在酒吧打交鬧事，有友人指阿豪表面雖受阿T擺佈，但心裏其實不滿，曾在背後罵阿T，「如果阿T、阿豪同阿K之中，我相信提出殺死者嘅係阿豪囉」。
單親出身 阿K盼賺錢養家
至於阿K，友人形容他斯文乖仔，但性格慢熱，平日說話不多，讓人感覺有點陰沉。不過阿K十分崇拜阿T，即使阿T的說話很誇張，阿K仍對他深信不疑。在單親家庭長大的阿K，更曾向友人提過想學阿T賺多些錢孝順媽媽，令媽媽有更好的生活。
