組合農夫成員鄭詩君（C君）昨日與拍拖五年的電台DJ黃天頤拉埋天窗。C君昨早出動星級兄弟團包括陸永、洪永城及蕭正楠夫婦等接新娘，而唐詩詠則出任大妗姐。C君表示因黃子華在棟篤笑的一番話，一言驚醒令他萌結婚念頭，而他向愛妻讀出自度的文言文「愛的誓言」，亦是參考子華talk show內容，他表明若將來違誓必遭天打雷劈。
現年36歲的C君昨早在酒店進行接新娘及斟茶等儀式後，晚上在中環四季酒店舉行婚宴，一對新人及兄弟團於晚上六時許現身受訪，新娘穿上象牙白低胸婚紗，而C君則是啡色西裝，兩人應傳媒要求咀嘴兩次。
陸永爆暗戀20年
提到陸永爆C君暗戀老婆20年，C君笑言是明戀，至於唐詩詠指從來沒有想過他會結婚，C君說：「單戀咗十幾年終於可以拍拖唔通諗分手咩，梗想開花結果。黃子華曾經喺棟篤笑中講過搵到好相處嘅伴侶，諗到佢係唔會為你帶來唔開心，咁有智慧嘅人都咁講梗要諗結婚。」而黃天頤表示兩人相處亦有嗌交，反而籌備婚事時卻沒有。至於早上文言文愛的誓言，C君指也是參考黃子華棟篤笑的內容，見到老婆穿上婚紗時亦一度眼濕濕，稍後會有幾天休息，明年才有時間度蜜月。
出任大妗姐的唐詩詠跟伴郎陸永一同受訪，她表示：「係新人要求我做大妗姐，但好難好驚，啲對白仲難過拍劇啲對白，又怕叫錯親戚名，講嘢又要押韻，啲兄弟又難服侍，好彩最後都OK。」陸永則說：「因為翠如話要做兄弟，唔想兄弟團太多女仔，而佢地位又咁重要，咪安排佢做大妗姐。」唐詩詠讚C君和老婆是絕配，兩人皆很聰明及互相了解，陸永則鬼馬說：「佢哋真係襯，特別係身高，佢哋識咗20幾年，C君好細個已暗戀對方。」
開門利是裝假狗
C君昨早由兄弟團陪同下到酒店接新娘，兄弟團有陸永、蕭正楠、黃翠如及洪永城等，唐詩詠則任大妗姐，眾人到新娘房已即時交上開門利是，但姊妹們一度叫價9,990萬元，陸永聞言笑說：「真係厚到利是封都擺唔落呀！」原來眾兄弟用銀紙包紙巾「裝假狗」，姊妹們發現即起哄，經議價後C君以開心大利是順利過關進入新娘房。
違誓遭天打雷劈
C君與兄弟團其後再接受遊戲考驗，扮成美少女戰士水野亞美的C君戴上眼罩口含唇膏為兄弟扮靚，兄弟們又要搽唇膏嘴對嘴傳膠片，最後一關他們要一邊口含威化餅一邊做掌上壓，C君瞓在地上被蕭正楠噴到成面餅碎。尾聲時，C君向老婆發表愛的誓言，他說：「天頤婚前一直都唔畀我叫老婆、太太，就算有人叫佢做C君老婆，佢都第一時間否認，強調只係我女朋友，不過過咗今日可以每日叫你老婆啦！一直以嚟好多新人都係讀愛的宣言，但係宣言係可以改或者唔算數，我自己度咗一段愛的誓言，如果做唔到就天打雷劈。」C君其後讀出一段自度的文言文愛的誓言，連新娘都大讚有誠意。
此外，C君和老婆昨日凌晨先後在社交網上載上頭相片，C君請來老友監製的兒子為他上頭：「圖中小朋友係我老友大監製周生個公子，蘇師傅口中將會有80年大運嘅人，行運行到90幾，行80年運都相信係我認識最好命嘅人，有佢幫我上頭，呢次掂喇師傅！」而黃天頤則請來媽咪閨密幫她上頭，黃媽媽更向她送上利是，兩母女隨後互攬合照。
採訪：盧妹
攝影：陳俊強