拿玻里打完齋唔要和尚，星期二踢完歐聯尾輪分組賽成功出線後，賽後即炒之前得罪咗球會狂人主席迪羅倫迪斯嘅安察洛堤，兼唔使一日就宣佈由肥安昔日弟子加度素接手。至於被炒嘅肥安，好快已經同阿仙奴、愛華頓呢啲搵緊主帥嘅英超球會扯上關係，其實佢份履歷（CV）咁靚仔，真係唔愁冇班落，但近年幾次都因唔同理由被革扯，睇嚟揀下一站都要謹慎啲。
拿玻里最近兵變，而肥安因為企喺球員嗰邊，同球會主席唱反調，喺大勝亨克4:0賽前已傳出無論賽果係點，佢都會被炒。拿玻里喺官方聲明就話主席同肥安關係如常，唔係外界所講不歡而散，但信唔信就大家自行判斷喇！
同槍手拖肥扯上關係
其實肥安以往一直好受球員同班主歡迎，執教皇家馬德里嗰陣連基斯坦奴朗拿度都聽佢話，但兩年前俾拜仁慕尼黑怒炒嗰鑊，似乎就搞唔掂球員同管理層之間嘅關係，令佢球壇好好先生嘅招牌被打爛。睇番肥安之前教過嘅波，車路士、拜仁、皇馬同拿玻里都係有個麻煩主席，不斷插手球隊事務兼口水多多。睇怕肥安下次再接手新球隊，都要留意番有冇啲唔正常嘅高層。
一成功力加度素被寸
早前炒咗艾馬利同馬高施華嘅阿仙奴同愛華頓，都有傳想搵佢執教，但ESPN就話肥安近年嘅執教成績麻麻，所以唔啱兵工廠嘅要求，仲話會畀時間暫代領隊龍格保去證明自己，而愛華頓亦出咗篇聲明，確認看守領隊鄧肯費格遜會繼續領軍喺周末作客鬥曼聯。另外，有報道仲話，雖然肥安唔再教拿玻里，但仍然有糧出，所以如果有球會想請肥安嘅話，可能要畀賠償費拿玻里，或成肥安返英超嘅最大阻礙。
至於加度素上任後，同主席迪羅倫迪斯出席記者會，前者謙虛咁話自己冇得同肥安比：「唔好拎我嚟同肥安比，因為佢係贏過各種榮譽嘅大贏家，而我只係個得41歲嘅教練，我都期待可以實現佢執教生涯入面一成成就。」不過隔離嘅迪羅倫迪斯就明嘲暗諷講咗句：「如果你只係做到肥安為拿玻里所做嘅一成，咁呢份工會好痛苦。」唔知之前教AC米蘭冇任何成績嘅加度素，會唔會仲快過佢師父冇得撈呢？