一直被指係元朗7.21恐襲事件幕後黑手之一嘅何君堯，喺區選中被選民vote out，但有人繼續唔知醜，接受黨媒訪問時大放厥詞，噚日仲將無賴行動升級，喺立法會動議譴責當日都俾鄉黑襲擊嘅民主黨林卓廷，佢喺發言時仲肆無忌憚爆粗，令議事堂內粗口橫飛。
無視《議事規則》
八方必須首先嚴詞指出，何君堯曾經被影到同7.21襲擊市民嘅白衣鄉黑握手兼言談甚歡，但佢之前就入稟告包括林卓廷在內嘅三個民主派議員誹謗，點知換來林卓廷反告同索償。
事件尚未平息，何君堯恃住建制派喺立法會有人數優勢，噚日動議譴責林卓廷，佢仲喺讀議案嗰陣讀埋林卓廷按當晚fb直播片段整理嘅時序表，當中有唔少粗口字眼，好似「DL」、「DLLM」同「PK」等，不過何君堯統統讀晒出嚟，一直做緊聾耳陳嘅立法會主席梁君彥，最終話PK唔係議會語言要何君堯收番，何君堯一度不服呼冤，話個字其實係指「仆街」，自己已經簡略咗。
拗完一輪何君堯最終收回言論，但已經過骨嘅DLLM、PK，甚至Fxxk You，就被立法會正式文件記錄在案，有民主派議員就關注做法有冇違反《議事規則》，點知梁君彥就幫何君堯兜，話佢只係覆述文件內容，仲話法庭文件都有粗口喎。其實今次呢個譴責動議已經捲入誹謗案件，但梁君彥照批准辯論，如果案件審完何君堯輸咗，梁君彥會唔會認自己做咗幫兇呢？
李八方