ViuTV節目《全民造星II》於後日假邵氏影城舉行總決賽，入圍十強之中，大熱的28號張天賦（MC）坦言從小個性反叛，家人反對他唱歌，有親戚更嘲他唔生性發明星夢，惟獨父親一直默默支持，雖然父親在他參賽期間離世，但今次能入總決賽，總算爭番啖氣，沒有辜負亡父的期望。
撰文：黃曉妍
攝影：陳慧安
節目《全民造星II》總決賽將進行十強大戰，入圍者包括14號吳啟洋（Phoebus）、20號李祉均（Oscar）、24號曾比特（Mike）、28號張天賦（MC）、29號梁德忠（Tank）、38號范卓言（JJ）、69號阮頌揚（Brian）、74號歐鎮灝（George）、82號丘凱雄（Hugo）和95號陳樂（Justin）。今年賽制由評判團及全民投票各佔一半評分。
「你鍾意做就去做」
一直被視為大熱的張天賦，日前與29號梁德忠及24號曾比特在九龍灣接受《蘋果》訪問，MC數年前由外國讀完書返港，之後經常在街頭busking，他笑說：「喺尖沙嘴、旺角、銅鑼灣busking，當時都搵到兩餐，但之後就越嚟越差，因為越嚟越多人玩呢樣嘢，跟住就搵兼職，睇吓有冇機會俾人發掘到，當時嘅目標係想多啲人識我，因為我鍾意唱歌。」
去年ViuTV推出《全民造星》，之後MC在朋友鼓勵下，再加上為了當時已患病的父親，決定參加《造星II》。他說：「我細個好反叛，除咗小學攞過啲獎項，人生冇乜成就，屋企大部份人都好反對我唱歌，覺得我應該腳踏實地，但惟獨爹哋會話『你鍾意做就去做』，當時我諗不如做啲嘢畀爹哋睇，唔好辜負佢期望，加上咁多朋友鼓勵我，於是的起心肝去參加，好彩入圍。」
參賽期間，MC經歷了最錐心之痛的日子，他說：「爹哋之前都有keep住問我比賽成點，叫我加油，喺99強自選表演，屋企人都有睇，原本反對我嘅佢哋，都覺得我唱得幾好，爹哋好開心，因為佢成日聽到親戚話我唔生性、淨係發明星夢，今次都叫上過電視，雖然未有乜成就，但爹哋覺得我起碼爭番啖氣，叻番次畀姑姐佢哋睇；即使爹哋好辛苦，佢都會煲湯畀我飲，好窩心。」MC說到亡父的默默支持，忍不住眼泛淚光。
接姜濤班：唔敢諗
《造星II》監製花姐指今次將有跳唱環節，向來不擅長跳舞的MC預計會被扣分，惟有在另外兩個環節爭取最好表現，問是否想奪冠做姜濤接班人？MC說：「姜濤接班人，我唔敢諗，但參加得比賽梗係向冠軍進發，想證明畀屋企人睇，我唔係淨係發明星夢。」