上星期日香港有兩項盛事，一項係國際人權日大遊行，在維園出發，大記者、大編輯、餐飲M等和理非人士齊齊參加，但大記者臨時覺得身體不適，在家休息。據大編輯回報，參加人數或者冇80萬人咁多，但在銅鑼灣塞滿抗議群眾，以佢多次參加遊行嘅經驗，點都會有四五十萬人，一定唔止警方宣佈最多係十八萬五千人咁少。大編輯在灣仔「眾新聞」賣書街檔附近觀察，大量和理非人士走晒出嚟，例如六月九日大遊行見到嘅名醫OT夫婦等等，全部經過街檔步向中環，或者當係區選勝利大遊行都唔定。
港島有和平大遊行，沙田就有一年一度國際大賽，左丁山自然在場，眼見會員棚人頭湧湧非常熱鬧，一位難求，因有大量外國傳媒、馬主、馬迷來港也，馬會素來識做主人招待來賓，三樓自助餐，生蠔龍蝦任食唔嬲、酒水任飲，不少澳洲傳媒直情人手一支啤酒，高興異常。後來馬會宣佈入場人數，原來公眾馬友人數大減，總入場人數只有三萬四千六百人，比去年下跌七成，不少人去咗港島遊行都唔定，但最令馬會滿意嘅數字不是入場人數，而係投注額創歷史新高達17億元。周永健主席、應家柏總裁應該飲得杯落，香港在困難環境下，仍然能夠舉辦國際馬壇之年終盛事，飲譽世界，值得香港人鼓掌讚番吓馬會。
左丁山弊在有時太過墨守成規，拘泥於往績，雖然肥仔K一早提醒，是日一定要買日本馬（短途錦標賽除外），因為日本今次派九隻馬參賽，八匹配海外騎師，只有一匹配日本騎師松岡正海，實乃全力搏殺跡象，日本騎師未及世界水平，近年日本馬主在海外參賽，要奪錦標，不要民族主義，已逐漸捨棄日本騎師，好似今次咁，換莫雷拉、蘇銘倫、李慕華等人策騎，就係一個拚搏兆頭。至於松岡正海又點？肥仔K事先話：「隻馬勝出光采可以孭佢返嚟！」唉吔！左丁山追住買潘頓，輸到眼光光，肥仔K第4場買潘頓（時時精綵）加三隻日本馬（耀滿瓶、旺紫丁、迪雅卓），中咗複式四重彩，easy執，之後就蹺埋雙手睇跑馬，唔再搏命。蔣芸大姐就中單Q噃（耀滿瓶、旺紫丁），問蔣大姐：「點解咁好心水中單Q，派336蚊！」蔣芸大姐答得妙：「有時刨馬未必掂，我今日着紫色外套，你居然又係着件紫色褸，即係旺紫啦。呢場係香港瓶大賽，咪應景揀耀滿瓶囉！」呢啲就係叫做運氣，左丁山衰在一早睇馬經，睇南華早報馬經講「旺紫丁」有輕微腳傷，星期六仲未知可否出賽，於是左丁山唔要「旺紫丁」（蘇銘倫騎），揀選莫雅之「御用畫匠」，咁就眼光光，睇住別人收錢啦！