24號曾比特（Mike）及29號梁德忠（Tank）當日與MC同場受訪，本身是音響技術人員兼唱歌老師的Mike指：「我形象偏向有喜感，有時我跳舞大家會話『好搞笑，好幽默』，加上花姐成日話我『唱歌真係好好，但真係好唔靚仔』，所以我覺得ERROR更加適合我。」能否做姜濤接班人，Mike稱與姜濤風格不同，難以比較。
舞蹈員出身的Tank，去年參加《全民造星》時，因要為張學友演唱會伴舞，無奈退賽，今年才再戰《造星II》，他說：「最初有諗過唔參加，因為介意人哋話我靠關係，其實我只識組合MIRROR。」被評唱功差，他指因為太緊張，導致出手汗及手震，為了克服缺點，他在『專業大獎』環節中揀唱歌，訓練心理質素，重拾信心。