自從建制派區選大敗後，佢哋將所有怨氣發洩喺政府身上，鬧政府隨時狠過民主派。好似喺噚日立法會，有議員質疑律政司檢控質素粗疏，當中喺區選大敗嘅工聯會立法會議員、「醬爆」陸頌雄，仲批評律政司人員檢控工作質素有問題，律政司司長鄭若驊就回應，有為檢控人員提供持續進修培訓。呢個時「醬爆」即時上身，大鬧話要啲檢控人員去再培訓，佢哋中英文名都搞錯，係咪要去再培訓局去讀英文課程呢？
曾自認英文「屎」
不過有政圈好事之徒聽到即時偷笑，事關「醬爆」佢啲英文不時俾人恥笑，好似佢以前去德國領事館抗議德國政府庇護黃台仰，佢讀嗰段英文聲明俾人放上網，網民狂笑佢英文差，仲揶揄「醬爆」讀嘅係咪英語！連佢自己係fb出po話自己英文「屎」，又試過因英文文法出錯，搞到佢提嘅修正案，俾立法會主席梁君彥「打回頭」。
一個英文屎成咁嘅議員，可以鬧律政司人員英文差，仲叫人去再培訓局讀英文？似乎要讀都係「醬爆」自己去讀先！