看不起香港 - 左丁山

看不起香港 - 左丁山

自曼谷回港,早上在曼谷機場見到人頭湧湧,場面熱鬧,下午回到赤鱲角,就見到冷清情況,入境關卡人潮疏落,與八月時大排長龍,甚有差距,長此以往,機場內商店一定要機管局減租啦。現在有緊急狀態,不准非登機人士入機場,幾難維持落去㗎,否則新世界集團投資二百億元興建機場內新商場,回報咪凍過水?新世界咁支持政府,政府唔會令新世界眼光光蝕本呀嘛?管制人流措施愈快撤銷愈好,凡是有管制,就有人顯官威;老友賓架H與太太(名校退休老師)已年過80,經常出外旅遊,兩人推住行李車,梗係行得冇中年人、青年人咁快,行過「檢查站」,有中年穿制服女士呼喝:「拎登機證出嚟!」兩人拎得慢啲,穿制服女士又不耐煩,面黑黑,賓架H對我地呻:「三十年前喺銀行有呢種職員嘅話,我一定炒咗佢,見到我兩個咁老,拖住行李,斷估都唔係黑衣示威勇武派喇,使乜咁緊張!」

經濟學理論話畀我地聽,凡有管制,就即刻產生交易成本(畀人黑面對待,傷自尊心,就係成本),在一啲東南亞國家入境,挾一張十元、二十元美鈔在護照內,當然係交易成本。管制人員一係收錢,一係擺款對待入境人士,有快感㗎。故此全世界官僚都喜歡藉安全之名,引入更多管制。管制在某些地方,可以係變相印鈔工具,或情緒發洩工具。

返到香港第二朝,畀人捉住開會討論一個投資講座,左丁山一路食不健康食物(餐蛋即食麵),一路聽對方講,最後佢講到可能有上海富三代贊助講座,但嗰位富三代好有霸氣,更成日話上海深圳會叻過香港,佢有啲頂唔順,問左丁山點樣可以攞到對方贊助,又唔使受氣。左丁山即刻飲啖熱檸水,咬住塊檸檬醒一醒神先,然後對佢講:「要錢就唔好要面,悶聲發大財最好!」呢位籌辦人E先生話:「……嗰位女士成日講香港人唔夠叻,學生唔夠醒,我就快頂唔順!」E君仲係未夠老,人地講乜咪講乜囉,頂住條氣做乜?有些內地人現在發了達,身家十億都未夠班,有一百億元人民幣先夠格,口氣自不然大啲,未免日益目空一切,趁現在時勢大踩香港。內地人自視甚高,學生考PISA全世界第一,幾威呀(中國參加考試學生並非隨機抽樣出來嘅,係由上海浙江等一級學校選派嘅)。之前曾與一位資深榮休教授談及內地學術水平,佢話三十年前到北京,內地學者對佢必恭必敬,十年前新一輩大陸學者對教授表面尊敬,2019年呢?參加學術會議,內地學者也開始講:「呀,你地都嚟呀!」基本上已認為香港學者之言,可以不理。香港人如何應對?不如用舊時蔣介石嗰句:莊敬自強,處變不驚,要對香港人有信心,對香港制度有信心(所以不准林鄭之流破壞之),自由靈活思想最終可以保障香港安定繁榮。