今年對香港人嚟講，真係離唔開抗爭。Google噚日公佈2019年度搜尋榜，大部份字眼都同反修例運動有關，連登成為最多人搜查嘅關鍵字同本地頭條，連被爆偷食嘅黃心穎都輸畀連登；各區開花嘅「連儂牆」，就成為十大熱爆意思搜尋。
自從反修例運動開始，香港人搜尋「連登」嘅次數一直高企，好多行動post檢討文都要睇連登，甚至連popo要靠睇連登收風，「連登」連奪熱爆本地頭條同熱爆關鍵字嘅第一位，可謂實至名歸。八方細心啲睇，半年以嚟有一段時間「連登」搜尋熱度達100%，就係十．一後，政府盛傳動用緊急法網禁連登，結果咪越禁越要搵嚟睇囉。
黃心穎爆偷食屈居亞軍
熱門字第二位係「黃心穎」，年初佢同許志安傳出出軌係茶餘飯後必講話題，不過事隔一個星期，幾乎冇人關心，男主角許志安亦只係排第六位。另外，願榮光歸香港亦打入熱爆本地頭條第六位，證明真係好受港人關注。
呢場運動衍生唔少新詞彙，有字唔識當然要問吓Google大神，十大熱爆意思搜尋榜入面，全部字眼都係同反修例運動有關，「連儂牆」成為第一位，呼籲手足知所進退嘅「be water」就係第二位。對比返上年熱門搜尋榜，全部都係食買玩嘅港豬攻略，八方真係覺得香港人進步咗好多。
「何已完」成熱話 777失第一
相信最鍾意考第一嘅林鄭，睇完Google呢張成績表應該唔開心，因為佢只能屈居話題人物第二位。第一位係邊個？咪就係何君堯囉，根據Google熱爆本地話題人物排行榜，「何已完」贏到777全因佢喺7.21後一周，搜尋熱度爆到100%。八方睇返資料，嗰個星期佢同白衣人握手兼讚對方英雄、父母個墳又被打爛，簡直係全城焦點，即使之後搜尋下跌都夠贏。777民望勁跌，連網民關注度都輸，真係情何以堪？
話題人物都不乏近來冒起嘅名人，例如排名第十嘅素人陳梓維，佢喺區選打敗咗民建聯葉傲冬；排第七嘅謝振中仲有趣，謝Sir喺10月初突然休息，網絡瘋傳佢因為被篤灰，要急急飛去美國救綠卡。另外八方見到「教育局」上榜熱爆本地頭條第二位，原來係三罷「黎明行動」嗰個星期，好多家長搜尋到底教育局有冇宣佈停課。
689盧偉聰過氣冇人理
睇完十大話題人物，一啲人名居然冇上榜，八方都覺得幾意外。包括剛剛退休嘅盧偉聰，話晒都係前一哥，搜尋率居然低過謝振中同鄧炳強，證明有時匿埋唔面對公眾，存在感真係會薄弱咗。不過咁，喺反修例運動之中，頻頻出post鼓勵篤灰帶風向嘅前特首梁振英，就同樣不入流。689之前又搞懸紅拉黑衣示威者，又話好多網民支持，結果網民似乎就唔想知，唔知係佢嘅支持者唔識用Google，定抑或用唔到Google呢？
李八方
