巴塞隆拿對皇家馬德里嘅國家打吡(圖)原定於下星期三舉行,不過有傳加泰隆尼亞示威者計劃喺比賽期間喺魯營球場示威,比賽可能又要改期。巴塞對皇馬嘅大戰最初定喺10月26日舉行,不過由於加泰近月發生咗多場大型示威活動,為免皇馬成為針對目標,場波改到去今個月18日。不過近日又有消息指一個加泰示威組織計劃喺比賽當日動員18,000人入場示威,當中有唔少人係持季票嘅巴塞球迷,令呢場國家打吡嘅保安措施面臨考驗,西甲賽會可能又將賽事改期。