昨日，我的落選黨友話我聽，你，想同我哋道歉？我當堂嚇一跳，然後得啖笑，仲想送你一個字，小。
如果道歉有用的話，仲使乜警察……噢對唔住，警察真係唔使道歉的。如果道歉有用，還要問責制幹甚麼呢？你明知對我哋唔住，點解你唔做啲實事呢？例如，你自己辭職。你辭職實在有一種一死以謝天下的良好效果。我知道，FT話你心有餘而力不足，阿爺唔俾你辭職，我明白喎，一入建制，身不由己，大家同坐一條船。
問題是，你自己不辭職，又不道歉，至少你也應該責成你的問責團隊，要他們祭旗，人頭落地，民望升起，就係咁簡單。
你又要團隊齊齊整整，又要市民聽聽話話，自己的施政又寸步不讓，天下所有便宜都你一個佔盡了。
強硬不成，可以軟一點，派錢的力度再多一些，審查的關卡再少一些，可以嗎？誠哥都派得比你有誠意，收買人心都做不來，你考甚麼第一啊妹妹？你派錢不如派裝修費，這段日子慘遭裝修的，應該免費復修，或者請師傅幫手改頭換面擇吉日重新開張，務求令人無法認到本來真名。
你不敢落區對話，至少也應該落區食飯吧？你北上和習大大會面，何不也拉一兩團自由行來香港，專門幫襯被裝修被杯葛的食店？你做點實事好不好，妹妹？
最令我激氣的是，你說要委任公職慰問我們，又說不會當我們是陌路人。
就像是情婦失去了名份，無法入主做正室，而你只賠上一個包包……還要是羅省A貨，即是羅湖商業城的A貨，誰稀罕呢？
甚麼公職、委員會？劉華當年失手總算有一個副局長坐坐，後來一路升職加薪，寧願一生都不說話都有幾十萬銀紙數錢，今天安排甚麼閒散公職便想打發我們，condom嗎？