林鄭以「we connect」作競選特首口號，到今次《逃犯條例》修訂風暴，確實將分裂了的泛民重新團結。一向站在小市民對立面的商界，更一度與市民同一陣線；仍堅持要成立獨立調查委員會的，還包括於今屆區議會敗選的G2000主席田北辰。
建制派當田北辰是壞分子，泛民嫌他不夠開明，田北辰要走中間路線，最清晰的身份是「一介商人」。他剖析香港大孖沙在社運前後角色大轉變、影響力已每況愈下；又被圍攻「返大陸賺人民幣」，他嘆港商在內地「生意好難做」，但想走又無退路；試問誰又能如誠哥般走（資）得漂亮。田北辰尷尬的身份，正如其政治定位。
記者：孫樂祈
被界定為建制派的田北辰，接受《蘋果日報》訪問，聲稱是要藉此與泛民選民connect，「敵我分明世界，對任何社會都唔好。泛民永遠唔接受《大公報》訪問，建制永遠唔接受《蘋果》訪問，對香港都唔係好事」。
田北辰在區選落敗了，他謙稱地區工作不足，輸得合理，但又多次提及自己與其他建制派不同，只是選民不給予溝通機會，「好多選民聽到我唔支持五大訴求，就將我標籤，我覺得佢哋根本冇機會畀我」。
7.21令商界connect港人
訪問約在他愉景新城的議員辦公室，訪問之先，他到旁邊巴士站派發單張，途經的市民不論老幼，點頭收下的機率頗高，「因為我冇講過令人好嬲嘅說話」。事實上，他這個建制壞孩子及商界人士，一度有跟香港人connect。
7.21元朗恐襲，是商界connect香港人之日，田北辰去信要求保安局局長，將失職警員撤職，「我當時唔喺香港，但我睇住電話，有好多揣測出現，我問咗六、七個問題，佢都冇覆我」。由長和主席李澤鉅、匯豐副主席王冬勝，以至新地、渣打、中電、港鐵等高層雲集的香港總商會，亦曾提出政府應正式撤回惡法，及成立獨立調查委員會。
然後，形勢急轉直下。太古被重罰，商界人士要頻密出聲明支持「止暴制亂」。問到中央今次可有施壓？這條問題似乎相當難答，田二少足足想了10秒，「愛國愛港人士，要全力支持特區政府依法施政，講咗幾十年。我哋如今加上『以主流民意為依歸』，我唔覺得自己對唔住國家」。跟隨主流民意，豈不是隨時與中央對抗？「中央點會同香港主流民意對着幹？我想問有乜好處，佢都想一國兩制成功」。
田北辰大膽指出中央誤判香港形勢，「中央收到好多錯誤訊息，遊行人數錯、蒙面法失效、區選話唔會出大事。錯到離晒大譜」。
商場太多 內地生意難做
為了這誤判，政府轉移視線搞土地供應，推出《收回土地條例》，地產商識做捐地、借地給政府、社企。關於商界要執行政治任務，田北辰兩次避開話題，甚至無厘頭扯到G2000的畢業生優惠，「我哋貴價西裝最賣得，但我哋永遠記住有畢業生，所以畢業生1,000蚊一套優惠仲喺度」。
轉個方式，問到商界的地位，田北辰才忍不住慨嘆，「以前中央對商界都會睇重啲，唔會話覺得商界冇盡力、收起啲地，谷高地價」。他直言港資在香港不會再獲優待，「仲有冇數碼港呢啲咁正嘅項目呢？我睇就冇喇。但喺夾縫中生存，就有空間」。
田北辰認為重啟政改，仍是商界所願，「呢個修例，令好多人覺得選特首應該有香港人參與。長遠政改走唔甩。商界都諗，香港對商界都已經冇乜保障，全民投票，至少有個平衡，中央、市民，特首對兩邊持份者都需要照顧」。
港人對紅色資本入侵，其中一個憂慮是中資內部的白色恐怖。田北辰雖然是建制壞孩子，但始終為建制一員，「國泰係好特殊例子，機師真係飛入境內，咁佢必然一定關注；如果純香港企業，佢好干預？我真係唔覺」。
有人問道，返內地賺人民幣，應可填補在香港的損失吧？G2000也有進駐內地市場，但田北辰指內地生意一樣難做，「商場起得太多，招呼同一班客，以前入一個商場就夠，如今要進駐三個商場，先做返同一班客。做生意睇本事、團隊、品牌定位，冇得賴」。
前景未明 拓東南亞市場
可惜中美正打貿易戰，港資想走亦無退路，誰又能如誠哥般走得及時？「有時同人傾開，發現邊度都冇得去，只有留喺香港做返好自己。中美打緊仗，點走去美國呀，英國又脫歐唔穩定。我同其他公司、大財團傾過，佢哋暫時覺得，如果真係走，都只能係東南亞附近發展」。他預測香港明年市道不會好轉，正努力開拓東南亞市場，但重心永遠留在香港，「G2000都係定位做香港品牌，唔會放棄香港」。
或許港資氣數未盡。由於泛民在區選大勝，特首選委的117票很大機會由泛民包攬，中央控制的鐵票縮減，商界有機會扮演「造王者」角色。故此田北辰指照邏輯，會惹商界很反感的政策，政府會考慮過才推出。