【本報訊】今屆工展會縮短展期及開放時間，但不少商戶表明不擔心。三和牌食品總經理張先生相信，示威者走進會場可能性不大，即使有網上號召「和你展」出現，張指「相信示威者有自制能力，我哋呢啲小商戶都係民生嘢。（假如有示威？）預防措施無諗過，唔相信佢哋（示威者）會有破壞性行為，對佢哋有信心」。
減少入貨應變
經濟轉淡，今屆工展會參展商減少兩成，每日開放時間提早兩小時結束。張認為主辦機構推出租金七折幫補，做法合理，因應今年的情況，決定不會在展場擺放太多貨品，部份會儲存倉內，寧願多走幾轉車方便應變，並強調從未曾考慮退出，「年年都做，如果突然唔做，有啲唔係好捨得」。
安記海味老闆潘權輝滿意昨日首日的人流，坦言經濟惡劣，若今年生意能達致去年的七成，已算是滿意的結果，「八成就（向員工）派利是，九成派大利是」。他提到入貨已減少一成，若場內出現突發情況，會配合大會安排決定去留。
受近期內地訪港旅客下跌影響，不少展商預料今次工展會將流失大批內地客。「美味棧」的負責人劉崇智指往年光顧的客人約三成為內地客，今年即使折扣更大，料也很難維持「七三比」。
今屆工展會展期至本月31日，開放時間為上午11時至晚上8時（12月31日於晚上6時關閉），攤位有700個，入場票價為8元。
■記者鄧溢禧