終於贏番場！阿仙奴看守領隊龍格保周一喺英超領軍以3:1作客反勝韋斯咸，結束九場不勝，球隊42年嚟最長不勝終於完喇！上任三場嘅龍格保話唔會得意忘形︰「上半場我哋好慢，跑動唔夠，都係因為球員冇信心，但我覺得『下半場試吓啦』，最後贏到算係咁喇。」
槍手嘅新星加比爾馬天尼利今場射入追成1:1嗰球，呢位18歲零175日嘅巴西兵仲打破紀錄，成為槍手喺英超首次正選就有波入嘅最年輕球員。雖然贏波，不過槍手好似未黑完，賽前就有右後衞比利連熱身時受傷，上半場就到左後衞基蘭泰亞尼傷出，好在前線今場生性，除咗奧巴美揚有波入，尼高拉斯比比都入咗球靚波，龍格保就話比比終於有覺好瞓喇。
