許廷鏗、鄭欣宜、陳柏宇、泳兒等，噚日喺灣仔出席《新城勁爆頒獎禮2019》記者會，新城今年取消實體頒獎禮，宣佈改為今個月28日下午2時至5時公佈得獎名單，屆時會邀請得獎歌手到新城領獎，新城知訊台執行總監程凱欣強調歌手唔會因為缺席而冇獎，暫定當日會頒發10首歌曲獎，但未知總共頒幾多個獎。
「失戀」得啖笑
許廷鏗今年嘅樂壇成績唔錯，頒獎禮陸續取消，朋友都戥佢唔抵。對於同性密友胡鴻鈞被爆同蔡思貝撻着，許廷鏗話預咗會被問呢件事，仲即刻笑指自己頭痛，問佢係咪因「失戀」而頭痛？佢笑笑口話：「頭痛係冇咗隻麻雀腳，𠵱家我斷咗腳。」又指其實唔知胡鴻鈞同蔡思貝嘅戀情真偽，佢話：「最近天氣凍，唔少朋友都有新戀情，可能要多啲溫暖，不過我仲係單身。」早前佢喺網上宣傳新歌，卻被網友解讀為抒發「失戀」情緒，佢無奈咁話：「我知有人想像力好豐富，對我同胡鴻鈞好多FF（幻想），講到似層層，我就得啖笑。」
至於欣宜對好友許廷鏗「失戀」，佢鬼馬話：「我唔知，我只係知道我同許廷鏗關係好似單戀咁，當佢有嘢做出碟時候就唔搵我，好冇良心呀！」而泳兒日前去咗瑞典五日，佢話天寒地凍落住雪拖住篋搵訂好嘅住宿，差啲凍死。
此外，蔡思貝噚日出席劇集 《踩過界II》嘅造型活動，講到同胡鴻鈞嘅緋聞，佢話對方只係好朋友，不過問到發展機會時，佢就轉移話題，話自己最近忙拍劇。
撰文：馮仁昭