蔡子強對區選統計分析，指出今次建制公屋票倉幾乎被泛民素人撬走，蛇齋餅粽剩番死蛇爛鱔。但同一時間富人區例如渣甸山這些肯定投唐唐都唔投689一票的真有銀族，素人挑機失敗。蔡子強講得好白，富人區唔恨福袋，亦未親身試食過比BBQ健康的國產TG，針冇拮肉，闊佬懶理。
話口未完，美國商會兩位外籍高層雙雙被澳門遣返，兩位家住的地區，唔係水泉澳邨，澳門朋友，對美國朋友下逐客令，帶出的訊息，叫當選寶馬山的自由黨情何以堪。原來只有黑警過深圳海底撈，有身家地位的商界代表不准過大海食水蟹粥。明年九月難保心頭有氣的商家，以一張（計埋功能組別有兩張）唔使錢的選票，隔住個大海，向姓賀的打臉！澳門班子，拖殘香港保皇黨後腿，泛民記得隔海謝票！
128大遊行前政府放風，會虛心聆聽。過去六個月，許多個黑色的日夜，政府聽到了什麼？陳彥霖墮海前的悲鳴？周梓樂從停車場殘酷無聲的墮落？爆眼爆頭骨折是什麼聲音？槍響我們看到了，新屋嶺與荃灣警署五分鐘不停的慘嚎我們也聽到了。PK721打橫嚟指四成人給警隊零分是受假新聞影響。「我地TVB嚟㗎！」遇襲記者向兩頰劃了紅旗的大媽高聲喊冤的新聞，摑了PK鄧兩個耳光！自作孽，聽到未？