仍然有人喋喋不休將黃背心運動的法國警隊和逆權運動的香港警隊拉埋作比較，企圖使出洪荒之力證明無惡不作的popo克制，唉，打咗懵仔針真值得同情啊，人為財死鳥為食亡，做打手這行如果收入以人民幣億元計，就話衰衰都冇所謂啫，為了區區五毛一帖天天獻醜，委實太可憐了，雖云職業無分貴賤，低級到這種程度，夫復何言。撇開呢層唔講，讓我們假設法警真的惡貫滿盈吧，你好做唔做將港警擱置於同一水平，唸唸有詞盛讚他們「其實晌宇宙黑警排行榜唔係包尾」，不是曲線詆毀林鄭麾下三萬大軍是什麼？就像世界某角落有個以醜樣馳名的非美人，你成日話畀人知「我哋條村阿乜乜靚過佢」，阿乜姑唔黑起塊面啋過你至奇。如此顯淺的道理也不明白，我係工頭就即刻炒鬼佢魷魚，連五毫子都慳番，如此浪費國家資源，麻煩親中愛國人士向霞姨單一聲吖唔該。
事實是，法警黑極都好，我從來沒有聽過他們喬裝暴徒放火燒車嫁禍良民，講起大話上嚟也有節制得多，一被踢爆胡言亂語馬上收爹，患上口腔痢疾停不了狂吐謊言的奇景見所未見。執行任務的時候，粗口由唇間飛出在所難免，但請原諒我性別歧視根深柢固，法式媽媽叉叉有股恰如其份的佬味，絕對不令人想起八婆，他們更加不會以拉仇恨為己任，專登用蓋世太保系列詞彙挑釁群眾以暴製亂，假如有害群之馬發出「死基佬」級別的人身攻擊，平權會肯定告到佢甩褲。呃，還是有豐富經驗的男體攝影師劉公子鬧得應棍：「你哋好得去邊？直到無倫，咪又係貪錢去影裸照！」