黃秋生受訪這天，在母校演藝學院重遇好友黎海珊，二人都是演藝學院第一屆戲劇學院的畢業生，秋生開學時曾覺她「巴渣」，結果卻成為無所不談的好朋友。黎海珊大爆秋生求學時的愛情故事，遭秋生制止：「你唔好亂咁噏嘢。」黎海珊表示秋生當年有個「釣魚會」，經常出沒舞蹈室外，秋生說：「嗰度最多美人魚，不過去到得個釣字，都冇魚上釣，黎海珊係『魚餌』，我成日問佢有冇新嘢？有冇身材好嘅。」
兩人相識34年，黎海珊分享對秋生印象：「大師兄當年喺學校好有才華，好多人仰慕，佢只係鍾意去三樓釣魚，我唔係佢目標。」秋生回敬黎海珊：「你都好可愛、好得意，係好值得愛嘅人。有啲嘢我為唔到佢出頭，咪借個膊頭畀佢喊吓。」黎海珊否認：「我幾時有？」秋生說：「我真係有借過，記得有次同佢坐車，我為咗避一個人坐隔籬，我就叫黎海珊過嚟坐我側邊，咁傾慕者見到唔會妒忌。」黎海珊回憶跟秋生去追女仔好好玩：「課餘我哋又會嚟canteen食嘢，我成日黐佢哋啲嘢食，有次秋生嬲嬲哋話要叫過另一份畀我食。」