噚日民陣舉行遊行前，PoPo忽然神探上身，高調公佈首次起獲真槍，仲有超過百發子彈，之後就由成日喺警察例行記者會上噏得就噏、最叻自行釋法嘅有組織罪案及三合會調查科高級警司李桂華企出嚟解畫，話有人想喺遊行度用槍械射擊警員或者傷害途人，呢個講法，同話銀仔一面係公仔一面係字其實有咩分別？
PoPo唔係第一次喺遊行前玩破案，呢招同狼來了異曲同工，唔少網民都恥笑佢哋重用劇本冇新意！究竟PoPo仲有幾可信，八方已經不願置評，但就見網民發揮創意，開始研究究竟警察仲可以搵到幾多大殺傷力武器，於是唔同動漫內容紛紛出場，咁當然唔少得高達啦，有人仲改埋圖變新聞報道。當然，今次運動和勇不分，大家講明「核爆都唔割」，難怪大家終極期待PoPo究竟幾時先搵到核武呢？