早前伊巴謙莫域向傳媒透露佢球員生涯下一站係意大利之後，大家都認為佢重返AC米蘭嘅呼聲最高。不過，最近有指拿玻里都對呢位38歲嘅前鋒有興趣，而伊巴就希望睇吓拿玻里可唔可以晉級歐聯16強先做決定，到時如果伊巴決定加盟拿玻里，佢除咗有機會重返歐聯賽場外，仲可以叫價要高啲人工。
有指拿玻里已準備為伊巴打破球員薪金上限嘅規定，以800萬歐元（約7,000萬港元）年薪吸引呢位瑞典射手來投。不過拿玻里近況就麻麻喇，上星期六意甲作客烏甸尼斯，喺上半場先失一球下，靠中場施連斯基喺69分鐘追平1:1執番1分，15輪聯賽得21分，各項賽事更九場不勝。
雖然話拿玻里喺周二歐聯分組賽煞科戰，主場迎戰亨克只要贏波就肯定可以出線，但係佢哋喺10月初首輪作客亨克嗰陣，都只係賽和0:0，之後球隊戰績同狀態就開始下滑，加埋成班球員同班主不和兼俾人罰錢，士氣大跌之下，要反底都唔係咁易。