【跑馬地】現年54歲天王郭富城（城城）昨日以腕錶品牌形象大使身份，到沙田馬場出席活動。早前有傳他以百萬元利誘老婆生仔，日前《蘋果》更撞正他到跑馬地買玫瑰返家冧老婆，城城昨日笑言婚姻不能用錢來衡量，更表示沒有追仔打算。談到近日的追仔傳聞，城城說︰「我唔知邊度嚟呢個消息，係佢哋自己創作，創作多過問我意見，有兩個女已經好幸福好開心，暫時冇呢個計劃，唔好畀啲報道妖言惑眾。」
「唔係舊式思想」
是否出一百萬利誘老婆生仔，城城說︰「完全係創作，唔係用錢嚟衡量，唔係買賣，聽到得啖笑，始終係一生承諾，建立幸福家庭用錢買好奇怪，有兩個已經花好多時間，太太又要搞時裝工作，所以暫時冇呢個意願，話我追仔係荒謬，冇呢個意願，女有女好，好sweet，我唔係舊式思想。」日前見他買花𠱁老婆，他說︰「係即興，屋企擺花有生氣，女仔都鍾意花，睇到都開心，自己經常都咁做。」
雖然未知追仔計劃今年能否實現，但城城喜事一籮籮，4月細女Charlotte出生後，愛駒「舞士精神」日前再贏頭馬，他開心說︰「係叻仔，多謝香港馬迷支持，不負眾望，贏係開心，不過喜歡賽馬活動嘅朋友唔好孤注一擲，我自己都冇投注，因為係馬主，贏咗都有彩金。」愛馬的他更說喜歡隻馬似他有鬥心，贏馬是其次，健康才最重要。
揀花心大心細
而日前《蘋果》直擊城城一身便服獨自現身跑馬地買花，當日下午他行入花店跟店員談了很久，心大心細似不知要買甚麼花，最後挑選了約十多分鐘後買紅玫瑰。買完花，城城攞車時發現記者拍照，即報以微笑，問他是否買花給太太方媛，他只說：「唔係，只係擺屋企。」據聞城嫂曾向閨密爆老公近日出手闊綽，豪送12萬港元的Hermès手袋外，更許下承諾若追仔成功，再送她一百萬現金作獎勵，所以不知城城是否出動獎品、鮮花及甜言蜜語攻勢，務求太太答應再生B。
採訪、攝影︰張明、羅德光、朱志聰