上星期六兩位當今球王分途出擊，啱啱贏咗第六座金球獎嘅美斯就大演帽子戲法帶領巴塞喺主場5:2大勝馬略卡；意甲祖雲達斯就作客喺基斯坦奴朗拿度（C朗）先開紀錄下俾拉素反勝，以1:3不敵對手，亦係祖記今季各項賽事嘅第一場敗仗，令今季歐洲五大聯賽再冇不敗之師。
35次戴帽西甲最多
賽前美斯帶埋老婆同囝囝，喺魯營球場展示佢第六座金球獎。今場成隊巴塞都特別醒神，「MSG」三子都有入波，開波七分鐘就由門將達史特根長傳助攻基沙文先開紀錄，蘇亞雷斯喺上半場尾段喺窄角度用後腳破網，賽後佢話呢球係佢生涯最靚嘅入波，而美斯上半場就射入兩球世界波，之後仲幫巴塞埋齋奠定勝局，今場更係美斯第35次喺西甲上演帽子戲法，超越34次嘅C朗成為西甲最多連中三元嘅球員。
值得一提係，喺呢場西甲嘅賽前記者會，巴塞教練華維迪無啦啦話要為美斯退休做好準備，嚇死唔少球迷：「美斯已經32歲，考慮同籌劃退休都好正常。我意思唔係佢呢三日就會退休，但我哋都要為呢件事做定準備。」計我話美斯今場表現咁掂，踢多幾年都仲得啦！
C朗被寸A貨吞首敗
另一邊廂，C朗就無咁好彩，被美斯咗紀錄外，仲要被寸，即將重返意甲嘅伊巴謙莫域早前話C朗揀隊已經七連冠嘅祖雲達斯根本唔算係挑戰，又話真正嘅朗拿度係巴西人，寸C朗只係靠後天努力。點知今場祖記就即刻受到挑戰，喺作客拉素嘅意甲大戰，雖然C朗為球隊先開紀錄，但完半場前就被對方嘅雷斯菲臘比近門破網追平，下半場更有古達度領紅被迫要10人應戰，最終俾拉素入多2球以3:1反勝。球隊吞下今季首場敗仗外，更錯失重返榜首嘅機會，落後榜首國際米蘭兩分。賽後祖記教練沙利就話：「我哋上半場嘅發揮唔錯，但張紅牌對我哋好大影響，我覺得呢個判決嚴咗啲，但球隊喺防守上真係犯咗錯。」