【娛樂人物】
現年58歲的黃秋生活躍娛圈37年，經歷風浪起跌，見盡人生變幻。五年前他被指撐「雨傘運動」而遭封殺，但這一切並沒有埋沒秋生良知，更令他人生得以沉澱和反思，至今仍勇於為公義發聲，日前他到東京為電影《淪落人》宣傳，提到連月來香港的社會狀況時，坦言叫日本觀眾近期別來香港，他說：「暫時唔好去香港住喇，因為啲警察黐咗線。」
撰文：比華利
攝影：陳俊強
黃秋生今年4月憑電影《淪落人》獲封金像影帝，該片將於明年2月在日本上映，日前秋生到東京為該片宣傳，並到戲院與優先場的影迷見面，現場主持問起香港的最新情況，向來勇於發聲的秋生向日迷發出「個人旅遊警示」：「你哋暫時唔好去香港住喇，因為啲警察黐咗線。我諗香港人嘅將來，係需要香港人自己去爭取嘅。」秋生更表示為香港人感到驕傲：「我非常敬佩香港年輕人嘅勇氣同埋佢哋嘅膽識。唔只年輕人，仲有好多香港嘅中年人、好多唔同界別嘅人都出嚟爭取，我從來都未試過為自己係一個香港人而驕傲！亦要多謝日本朋友將我哋首《願榮光歸香港》譯咗做日文，好好聽。一路以嚟，香港同日本喺文化等各方面，大家都係互相喜愛，所以希望喺將來大家都會為自己地方嘅美麗繼續努力。」
多謝王晶踩多腳
屈指一算，秋生自1982年入行至今，活躍娛圈37年，除貴為影帝，他也憑無綫劇集《梟雄》封視帝，舞台劇《螳螂捕蟬》又榮膺劇帝。日前秋生在母校演藝學院接受《蘋果》專訪，走在校園令秋生勾起不少開心回憶。秋生認同人生如戲，他在訓練班出道時扮過死屍，跳入大銀幕則當男主角。
人生變幻原是永恒，秋生於2014年被指支持「雨傘運動」，即傳出遭封殺，當時王晶再踩一腳，但秋生不怨不恨：「我要多謝王晶先生，大家知乜事啦，我唔係講反話，因為佢，我停咗落嚟，沉澱咗五年，佛教入面講，所有害你嘅都係善知識，令你醒悟到人生有好多道理，唔係佢，我會繼續係咁搵錢，身體狀況一定死咗。」秋生直言停下來令他開始注意健康：「早起身，晏收工，喺內地長期食公仔麵，一係肥肉，壓力大又飲酒，再捱五年，我『拜拜』咗㗎喇。」雖由高峯跌到谷底，見盡圈中人情冷暖，但秋生感激伯樂杜琪峯和楊受成等仍繼續找他拍戲。
審視自己性格差
五年沉澱，秋生重新審視自己，他說：「我一直以嚟都衰衰格格，冇禮貌、冇修養、牙擦、驕傲、自大，傲慢上身，我係中式版『西哈諾』。但嗰段日子，我沉澱咗雜質，提升自己人生。」面對事業低潮，工作量減連收入都少了，但秋生還是不愁生活，「唔好話我爛船三斤釘，我唔係爛船，我係遊艇嚟，我都做咗咁多年嘢。如果大家覺得我慘，咁等啲心理變態五毛開心啲，當咗我係散工、泥工，以為冇工開冇飯食。」看透世事的秋生體會到人生變幻莫測，「人生多變化，好變唔好，唔好又變好，尤其香港變成咁，係唔會知。回歸後，你睇到，今日高官，聽日階下囚，今日風光，聽日打靶。我經常同呢行晚輩講，今日威唔好牙擦，你聽日冧番落嚟，𠵱家啲人唔見得想人哋好，心理變態，好想人哋衰，一見你跌落嚟，踩到你想返出嚟都唔得。」
白色恐怖如麻瘋
秋生坦言想多拍戲都未必有機會：「啲人猛話你被封殺，唔用得你，係咩？有冇文件，聽聞囉，白色恐怖就係冇人話畀你聽發生乜嘢事，但你側邊嘅人會造成一種恐懼，你行出街冇人會同你講嘢，個個覺你有麻瘋，咁跟住你開始發覺，我係咪有麻瘋呢？我覺自己行為，係咪有啲嘢我應該講，有啲嘢唔應該講，係咪我應該乜都唔講呢，我就開始困住自己，咁就開始癲囉，進入恐懼狀態咪開始癲囉，但你搵唔到源頭。」秋生自嘲變成「佛地魔」:「個名唔提得㗎，你試吓喺內地提『黃秋生』，拉你呀，同埋打入去search『黃秋生』，彈禁止，成件事你問我，咪荒謬荒誕。」
場地提供：演藝學院