【本報訊】今屆區議會選舉不少「政治素人」撼贏建制派，其中一位便是中西區大學選區的任嘉兒。「佢哋（居民）覺得原來一幅好大好大嘅高牆，其實都有機會可以打破」。任嘉兒說民主派大勝的結果，正正反映港人的聲音，是對政府「施政失當、警暴等問題係必須面對」的表態。建制派一直是區議會的大多數，不肯就警方在民居施放催淚彈問題開會，她有信心新一屆民主派區議員將要求警方交代瘋狂施放催淚彈行動，讓港人判斷警方行動是否合適。
「原來有啲嘢係可以改變」
「當日（選舉日）係平常心，因為我盡咗力㗎啦……宣佈結果嗰陣，好多街坊都喊，佢哋覺得原來一個好大好大嘅高牆，其實都有希望可以打破」。任嘉兒認為，自己當選能為當區居民帶來一個希望，對此感到高興，「原來有啲嘢係可以改變，其他嘢都唔好放棄」。她亦不斷提醒自己，地區工作不能單靠個人，未來四年希望與當區居民和港人同行，這樣才能令地區和香港變得更好。
訪問約在任嘉兒經常拉票的地方，等待拍攝期間，有街坊向她示好，並討論區內問題和政綱。「之前有街坊講好多謝我行出嚟，令到佢哋真係連結埋一齊，以往可能行過隔籬會認得，但從來都唔會打招呼，經過今次選舉會發覺人同人之間嘅關係好好多，真係會打招呼，傾吓呢區有乜可以改善」。今屆當選的區議員有別於以往，除服務社區的工作，亦肩負起港人對政治訴求和期望。她認為政治同民生兩者不能分割，亦不諱言今次區選民主派大勝是對政府一個很大的警醒，「有班沉默嘅大多數其實有佢哋嘅聲音，今次區議會已經發咗聲，話畀政府聽施政失當、警暴等問題係必須面對」，同樣地政府必須回應港人提出的「五大訴求，缺一不可」。
無黨派背景更易聽民意
警方過去多個月在全港各區施放大量催淚彈，影響港人生活和健康。任嘉兒相信新一屆民主派區議員上任後，會要求警方交代施放催淚彈的行動，「好似7.21中上環衝突，（警方）瘋狂喺中上環民居發放催淚彈……中西區（區議會）點解唔可以要求警方去交代行動？就係因為建制派唔肯就住呢件事開會」。她期望，未來藉民生議題令居民更關注警方施放催淚彈問題，「究竟警方行動係咪適當呢？畀市民了解有咩可以改善，希望修補呢個關係，如果再繼續咁樣落去，（警民關係）係返唔到轉頭」。
任嘉兒作為一名政治素人卻不打算加入政黨，「對地區工作包括政治表態，個自由度會大好多。我完全唔想有太大掣肘，因為冇政黨背景係更容易反映居民聲音」。她明白有些建制選民仍不滿其當選，惟有未來在地區工作做得更好，令他們改變看法，「我成日都講唔係淨係為支持我哋嘅人工作，而係令到更多本身唔支持嘅人去支持埋我哋，呢個係嚟緊呢四年要做嘅工作」。
■記者張文鈴