一年又快過去，香港發生唔少大事，其中「小兵」同「昆蟲」嗰單，到𠵱家仍然係茶餘飯後話題。Jessie日前同成班朋友食飯，有個同小兵前度「叻沙」好好朋友嘅一線小生，當晚就忍唔住提起老友，佢話雖然大家覺得件事好震撼，又戥叻沙唔抵，實情佢應該一早預咗小兵係啲乜人。
話說有一次成班台前幕後去慶功，咁啱有影視兩邊都多朋友嘅「高佬」在場，於是大家玩到差唔多，高佬拉隊轉場去唱K。小兵同成班小生花旦一到場，見到入面有好多知名大前輩喺度，就成個人high晒，四圍去同啲人搭訕，之後越飲越多，仲主動挨身挨勢，又用好嗲嘅聲線同人講：「你好玩得呀。」咁啱叻沙呢個時候到，小兵見到另一半喺度，竟然冇收斂吓，仲上台坐喺另一個前輩大髀上唱歌，難得嘅係叻沙木無表情，好似唔當係一回事。
不過講開叻沙，有花旦爆料，雖然佢表面冇乜嘢，但係呢件事都影響叻沙好深，未發生問題前，叻沙去到片場都會撩其他人傾吓偈，𠵱家就成個人變晒，尤其係少人嘅時候，就算成班人去食飯，佢仍然係粒聲唔出，真係一粒聲都唔出，而且幾乎所有飯局、party都推晒。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。