已故才子黃霑的女兒黃宇詩在2014年放下藝人身份，走去創業，當時她在元創方（PMQ）開設自家品牌內衣店，雖然正值雨傘運動，但未有動搖信心，結果在2017年再開分店，豈料今年又遇上反送中運動，她不諱言上月生意受到影響，但她覺得：「做人同做生意都要靈活變通啲，大家都未遇過呢個時代，要睇吓大家嘅功夫。」更相信港人有運氣，始終會轉好。
撰文：唐琛悠
攝影：沈健程
現年43歲的黃宇詩在1998年從加拿大回流返港後加入無綫，雖然是黃霑的女兒，媽媽華娃是著名歌手，但發展不似預期，入行多年參與過不少主持工作和劇集演出，不過發揮機會不大，結果在2014年她決定淡出娛樂圈，建立自家內衣品牌，甚少在幕前出現。事隔多年，黃宇詩在好友陳圖安的邀請下，為香港開電視主持節目《滋味人生》，在節目中訪問十位名廚，了解他們怎樣在入廚和營商中悟道人生。在現實生活中，黃宇詩亦坦言當初決定轉行學做生意，對人生有另一種新體會。
做藝人睇唔到將來
黃宇詩的內衣店分別座落PMQ和銅鑼灣，開業後分別經歷過雨傘運動和反送中運動，對生意或多或少有一定的影響，不過她說：「今次係一個挑戰，好似會繼續落去，我自己有一個好儍嘅諗法，香港人始終都有少少運氣，始終都會轉好。」她還說：「過去嗰幾個月唔差，但今個月（11月）係有少少影響，好彩租金唔算太貴，撐到吓，繼續努力啦，諗唔到咁多，今日唔知聽日事，過得一日得一日。收早啲咪返早啲囉，做人同做生意都要靈活變通啲，我相信唔止我一個，其實好多人都遇到同樣嘅問題，大家都未遇過呢個時代，要睇吓大家嘅功夫。」
正如當日黃宇詩放下藝人的身份，走到另一邊從頭開始，對她而言亦是新挑戰。回望過去，她笑說：「可能以前真係太得閒，工作量唔係太多，嗰陣覺得自己年紀都唔細，由外形到演技都對自己冇信心，所以咪揀做主持呢條穩定嘅搵食路。慢慢開始睇唔到將來，覺得冇乜前景，做幾耐都係一樣，突然行到個位，希望有自己世界，咪選擇咗呢條創業路。
面對壓力有新體會
黃宇詩續說：「呢個係人生另外一個階段，我都幾開心揀咗呢條路，以前做幕前真係好幸福，嗰陣兼顧嘅嘢唔多，讀好啲稿，搞好個樣就已經好夠，但係𠵱家發揮空間大咗，自由度大咗，變咗好似慢慢搵到自己。不過諗嘢係諗多咗，白頭髮都多咗好多，但係我真係好開心做咗呢個決定，可能做嘅嘢好辛苦，壓力同面對嘅嘢都多咗，但係對人生嘅體會，係有另一個層次。」她還笑說：「𠵱家諗番都覺得自己（以前）唔識變通，冇咁開朗，屈住自己，做咗啲錯嘅決定，不過如果我真係咁醒，就唔係咁。」