大熱天時走進士多，一手插入水冷雪櫃享受冰涼快感，大概是不少80前的童年寫照，隨着士多不斷消失，印象漸變模糊，甚至只能在微縮場景中緬懷，偏偏有鈕扣廠老闆中年轉型，由砌出一間一比一的復古士多公開展覽，到租店售賣舊零食，再與收藏狂迷合夥開設懷舊場景照相館，冀令更多舊物走出博物館展品的框架，做到真正活化。
記者：莫 問 攝影：周鴻熙
士多情意結 緣於「細個好為食」
走進觀塘的美樂照相館，先後走經舊機舖、活字印刷坊、舊式冰室、唐樓客廳、上海理髮店、九龍城寨牌坊、龍鳳禮堂、舊戲院、七十二家房客板間房、黑板小學課室等場面，儼如穿梭在香港七、八十年代不同時光，這些已消失的場景，由細至一蚊大小的舊汽水蓋、手寫價目表、以至高過成人的殖民時代英女皇郵筒，每件物品均是負責人李志偉（Patrick）與從事藝術設計的合夥人Slash十多年前親自收藏得來，部份更是越洋搜集，絕非一般模仿品可比。
照相館的緣起，應由Patrick的士多情意結開始。「我細個係個肥仔，好為食，返屋企前會坐喺士多門口飲支汽水，食完零食先返屋企，人生到咗結婚有小朋友，諗返舊時情景，開始儲吓嘢，大部份係士多常見物品，汽水蓋、汽水樽，之後大大件的汽水櫃都儲到返嚟。」
數千儲物 自high不如展出
笑言「乜垃圾都收藏」的Patrick，物品越儲越多，多達數千件，家中空間開始不敷應用，在長沙灣租用辦公室經營鈕扣生意二十多年的他，忽發奇想。「與其儲返嚟擺喺度，得自己睇係好可惜，三年前喺長沙灣辦公室騰出1500呎，砌咗個1:1士多出嚟。」士多公開展覽後，獲得不少正面迴響，他膽粗粗前年開始在商場及星光大道等租舖經營懷舊士多或開設Pop-up快閃店，中年再創業，嘗試用興趣開拓另一條路。
Patrick堅持走回懷舊小店的路線，過程殊不容易，例如已經沒落的水冷式汽水櫃，是他早年與士多老闆溝通，囑咐退休後出讓，約一半機器已生銹，一經移動便破爛至無法修補，Patrick收回倉內檢查，救得一部得一部。「我哋曾經根據水冷櫃個名牌搵原廠，搵到佢哋都話唔整啦，都係幾十年前的物品，幸好夜冷師傅當年都維修過呢類雪櫃，搵佢哋做返都ok。」
不問回報的收藏，會有尋寶的驚喜。「最開心試過收部汽水櫃，發覺汽水櫃下面個汽水蓋兜鋪滿塵，裏面有好多汽水蓋，歷史超過二、三十年，好似執到寶咁開心。」一說到汽水蓋，Patrick便如數家珍般介紹，「早期係用水松木做蓋掩，後期先用膠掩，因為可以掀起抽獎拎贈品。」
而早已在本港貨架消失的印水紙吹波糖或綠寶橙汁，均是Patrick親自從日本或泰國搜購而來，冀活化成真．士多。「舊物本身係死的，但我哋想將佢重現，只有透過賣零食，家長帶子女嚟到，唔會好似博物館咁影張相睇下就走，做到真正活化，呢個先係我的初心。」
互動照相館 「將舊物傳下一代」
去年他再與另一個從事藝術設計的收藏家Slash再接再厲，合夥在觀塘開設懷舊照相館，開拓更多舊香港場景，負責佈置的Slash稱，由邀請NGO（非政府機構）帶同長者參觀，以至三代同堂合拍家庭相，超越一般影樓的作用。「NGO招呼老友記，佢哋好開心，睇到部印刷機好開心，話我教你用呀，呢樣再唔係一個佈景，而係一個有互動功能的場景……咁係傳承，將舊物Pass畀Next Generation（下一代）。」
似搞初創企業 淡市勉勵港人
有些事物非單純用錢去衡量，Patrick滿意之作，還是與活化有關。「香港好多嘢都消失緊，有個整西瓜波的伯伯三年前退休，廠都冇埋，西瓜波從此消失，好多學校如皇仁書院每年傳統有搞踢西瓜波比賽，咁樣冇咗有啲可惜，去年有位退休叔叔，見我賣緊最後一批西瓜波，問我有冇興趣，佢重做西瓜波畀我哋分銷，如果有心人整一批出嚟，我哋再用，咁樣係最理想的結局。」
生意從來與賺蝕掛鈎，二人不斷努力開拓業務，但非陳健波所云的「中年收成期」，反而在近月社會運動及經濟環境劇變下，變回初創投資的起步階段，Patrick淡言一笑：「之前投下幾十萬當係交學費，仲未穩定。」零售業吹淡風，有人辭官歸故里，有人漏夜趕科場，Patrick語畢趕在尖沙嘴集會期間，在催淚煙與胡椒彈交集中在星光大道如常開舖，他說，真心相信近月掛在口邊的一句說話：「香港人加油！」
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。