【本報訊】粵劇界一直予人印象保守、親建制，但近日網上熱傳《願榮光歸香港x肥媽有話兒》大戲版，在YouTube三日便有逾十萬點擊率。製作團隊強調，很多粵劇都是反映時弊，例如《竇娥冤》講冤案、《十奏嚴嵩》罵貪官，希望創作可緊扣時代聲音，「連結返當下城市發生緊故事，粵劇唔係得一種。」
大戲版榮光製作團隊接受《蘋果》專訪時不用真名。成員之一「白馬嘯西風」指，戲迷近月流傳一個名單，「WhatsApp有個名單，佢係黃嘅、佢係暴徒，我哋要抵制佢，我哋唔可以再睇佢做戲，咁有乜為呢？」
「粵劇不只是娛樂」
他指，這幾個月粵劇界如常演出，彷彿與社會事件無關，印象最深刻是白衣黑幫在北角打人，但新光戲院仍然如常演出，「裏面有裏面演大戲，外面有外面抗爭，後尾戲院仲落埋閘添，咁開始諗粵劇除咗粉飾作用，仲有啲咩呢？」
另一位成員「無業遊民」指，粵劇不只是娛樂，曲目應反映時弊，「譬如《竇娥冤》六月飛霜講冤案，講古代不公義；譬如《十奏嚴嵩》講以前貪官問題非常嚴重……𠵱家粵劇反映唔到時弊，演藝界人士怕得罪金主而噤聲。」
他和幾位粵劇人籌組大戲版榮光時，亦要低調行事，「明明一個好理所當然，好理直氣壯做自由創作一件事，結果要好似一個秘密組織咁樣去統籌去策劃。」「白馬嘯西風」指，幸得專業人士義務相助，「粵劇都有有良心嘅人，都係有人想發聲㗎。」
歌曲11月29日上載YouTube後，三日內逾十萬點擊率。團隊成員「呀遮」感謝網民支持，亦希望大家留意歌曲的粵劇元素，例如拋纓槍代表示威者冒槍林彈雨前進；武將背插的靠旗代表命令，比喻警察收政府指令清場；花旦在曲末撐起油紙傘與市民同行。歌曲技巧方面，運用數白欖、子喉和平喉等。
歌曲中段特別加插《肥媽有話兒》，並用拉腔技巧配合鑼鼓。「白馬嘯西風」說靈感來自電影《西遊記之仙履奇緣》，「其實就係受家英哥啟發，佢嗰首《Only You》呢，拉腔拉得好妙。「白馬嘯西風」說團隊希望憑曲寄意，鼓勵香港人繼續加油。
■記者潘柏林
