大陸官媒CCTV近日全力發功幫香港警察洗白，呢個星期就喺佢哋要翻牆先用到嘅fb專頁出咗輯文宣圖，借用抗爭一方嘅口號：「沒有從天而降的英雄，祗有挺身而出的凡人」做主題去形容Popo，其中一張就話呢班人形objects「他們亦會挨夜加班，一個飯盒就當晚餐」，結果引來香港網民狂派負評。
呢張文宣撇除「祗有」疑為別字實作「祇有」甚至港人常用嘅「只有」，而「挨夜」就應用「捱夜」外，其實用一個飯盒做晚餐根本就係香港人生活之日常，唔少打工仔仲可能忙到冇時間食飯，但Popo加班就有豐厚超時補水囉，似乎CCTV更加想全香港人知道，香港有班生在福中不知福嘅警察囉。
其實八方仲有理由相信CCTV根本想惡搞Popo，因為張文宣配圖偏偏搵咗Popo喺灣仔被自己夥計亂放催淚彈連累，結果食煙食到嘔嘅狼狽一幕，同時不問自取盜用USP社媒影嘅相，唔知會唔會賠錢呢？有專頁就睇唔過眼改圖回應：「沒有從天而降的OT，只有亂X咁放的TG」，完全係一針見血擲地有聲！
國會山莊當作白宮
不過，CCTV醜出國際絕對唔係個別事件，之前特朗普簽咗《香港人權法》，佢哋就出圖煽動人去「裝修」白宮，點知搞錯咗國會山莊，結果噚日下晝要刪圖刪文，然後就當無事發生。
李八方