「又到聖誕、又到聖誕」踏入12月到處都係節日氣氛，不過今個聖誕對香港人嚟講同過去有好大分別，漫長嘅反修例抗爭仍然持續，即使喺節日裏面，大家仍然諗住點為運動出一分力。喺屯門樂翠區擊敗何君堯嘅民主黨準區議員盧俊宇就計劃，組織《願榮光歸香港》報佳音合唱團，喺聖誕節繼續「和理sing」。
走訪各處和理sing
盧俊宇同八方講，今個聖誕相信每個香港人都有唔同嘅心情，對香港人嚟講最好嘅佳音唔係傳統聖誕歌，而係代表抗爭嘅《願榮光歸香港》。佢希望可以喺聖誕節，將「榮光」嘅佳音帶畀所有市民，而自己又喺音樂方面有興趣同能力，於是組織合唱團，喺唔同地區、商場高唱《榮光》，分享節日喜悅。盧俊宇又話目前只係籌備階段，暫時未知有幾多人參加，各大商場、中環遮打道或者銅鑼灣時代廣場都會係《榮光》合唱團考慮演唱嘅地點之一。個活動歡迎小朋友同老人家參加，佢強調合唱團係和理非，唔擔心會出現暴力或者安全問題。