台灣男星高以翔日前喺內地參加綜藝節目《追我吧》錄影時昏迷暈倒，送院搶救無效，終年35歲，唔少fans對浙江衛視嘅做法極度不滿，到噚日浙江衛視話決定會永久停播《追我吧》。同時浙江衛視總監對高以翔出事經過作出回應，佢話喺27日凌晨約1點26分，高以翔開始進行賽道環節，跑咗4分鐘約600米後，便放緩步伐，坐咗喺旁邊嘅花槽後暈倒：「發現異樣後，跟隨導演即呼叫現場待命的救護車，距事發位置較近的嘉賓也從主舞台跑向以翔。倒地後1分46秒，現場待命的寧波急救中心醫護人員趕到並開始實施專業搶救。急救20多分鐘後，救護車將以翔送往附近的三甲醫院——寧波市醫療中心李惠利醫院，經過兩個多小時的全力搶救，院方宣佈搶救無效。」至於點解一直冇回應事件，浙江衛視就話因考慮到高以翔嘅家人同經理人，希望低調處理的意願。
女友夜夜守靈
此外，高以翔女友Bella喺台灣夜夜守靈，都着住男友生前嘅黑色銀釦外套，右手戴住情侶對戒，大拇指戴嘅係高以翔嗰隻，尾指嗰隻就係自己，象徵「生死不變的婚約」，Bella舊年喺Ig直播影片上，大方表示同男友以結婚為前提交往，仲話：「我還蠻認真的，我是一個很癡情的人，交往的話我都會很認真。」
撰文：馮仁昭