早前喺金球獎投票以7分之差輪畀美斯、僅得第2嘅利物浦中堅華基爾雲迪積克（VVD），被指喺接受訪問時冒犯祖雲達斯球星基斯坦奴朗拿度（C朗），話對方唔係佢對手，結果惹嚟C朗大家姐卡蒂亞喺ig出文狂鬧，話VVD根本冇資格同佢又攞過5屆金球獎、贏過5屆歐聯錦標、3屆英超冠軍，兼喺今夏歐國聯決賽當住VVD面幫葡萄牙踢走荷蘭攞冠軍嘅細佬C朗比較。
英國著名記者摩根亦再加一腳，喺twitter轉發VVD嘅訪問，又指C朗係位偉大嘅球員，VVD根本唔入流。VVD一睇就知中伏，即刻喺摩根嘅留言反駁，指對方斷章取義，澄清話當時只係講吓笑，如果有睇晒全個訪問，就一定知佢好敬重美斯同C朗喎。
