曾效力阿積士同米蘭嘅荷蘭名宿尹巴士頓,因喺直播節目度用咗納粹語言,除咗即刻俾Fox Sports停職外,連足球遊戲商EA Sports都將佢喺遊戲《FIFA 20》嘅「Icon」落架,直至另行通知。據悉EA Sports已向國際足協表示相當關注尹巴士頓嘅言論,因此會暫停佢喺遊戲中嘅「Icon」,直至另行通知為止,先會再上架。尹巴士頓雖已退役,但喺FIFA度同施丹、杜奧巴同埋朗拿度等傳奇球星一樣,會喺部份遊戲模式入面揀得到,但佢早前喺Fox Sports講咗納粹用語「唔太好睇,勝利萬歲(sieg heil)」惹嚟爭議,電視台即刻停佢職一星期。其實納粹喺西方一直都係禁忌,尹巴士頓呢鋪真係放火燒自己後欄啦!