周柏豪同老婆Stephanie結婚三年，《蘋果》收到讀者爆料，原來35歲嘅柏豪已靜雞雞做咗老竇，太太大前日嘅港島區醫院秘密生咗個女，母女平安。噚日喺醫院見到戴住口罩嘅柏豪，佢開心承認喜訊，之後佢仲向傳媒公佈喜訊同B女合照，表示B女6.7磅重，頭髮仲濃密到似戴咗冷帽。
眼睛像寶石
噚日下午4點15分，柏豪同幾個朋友齊齊行出醫院，記者上前恭喜啱啱榮升老竇嘅佢，問到女兒情況，佢好開心咁話：「多謝，最緊要健康，遲啲話畀大家聽。」問到屋企人係咪好開心？佢話：「全部人都好開心。」仲話個女暫時未改名，問到會唔會由佢親自改？佢話：「諗緊，度一度。」
柏豪之後向傳媒發相發文，暢談做老竇心情︰「我家小囡剛誕生，我們當爸媽了，這位周小姐出生時6.7磅重，看起來像媽媽一樣的美，細小的身軀擁有十分響亮的叫聲，眼睛也像寶石一樣的閃亮，頭髮很濃密，還以為出生時附送了冷帽一頂。哈！這刻的感覺是難以形容。」
請婆婆保佑
柏豪大讚老婆偉大，又話會令小公主健康快樂善良，最後仲突然話好掛住婆婆，請佢繼續保佑剛出生嘅小生命。
其實早喺今年5月，柏豪夫婦被影到喺九龍城撐枱腳，當時周太着住鬆身衫同平底鞋，孕味十足，走嗰陣，柏豪仲好細心咁扶老婆上車。不過事後問老婆係咪大肚時，柏豪就否認：「我老婆着鬆身衫着咗兩年啦，有好消息嘅話，一定同大家分享。」