因為同教練法夫利不和，最近已經冇得踢正選嘅多蒙特翼鋒查頓辛祖，據報已經忍無可忍，仲希望喺下月轉會窗重開嗰陣即刻走人。咁啱嘅係，一直吼住呢位英格蘭新星嘅利物浦領隊高普，亦承認紅軍下月可能會出手增兵：「我哋一直以嚟都唔會講太多，但如果係幫到隊波嘅，我哋隨時可以出手做啲嘢。」不過對於斟介辛祖一事，高普就乜都唔講，只係讚對方係一個好球員，又話如果多蒙特真係索價一億鎊，咁就真係好難搞。但係利物浦喺翼位已經有穆罕默德沙拿同沙迪奧文尼兩大鐵膽，後備又有梳頓沙基利，而19歲嘅辛祖當初就係想穩定上陣先由曼城轉去多蒙特，如果紅軍保證唔到辛祖嘅上陣機會，要撬佢都唔係咁易。