已淡出政壇嘅前立法會議員大嚿陳偉業，可能冇乜人仲記得佢，不過佢冇唔記得香港。話說大嚿整咗本《區議員入門手冊》畀一眾區議會新丁參考，八方睇過，都相當仔細。佢仲特別叮囑一班新人，做區議員最重要係個心態。
要同街坊打好關係
大嚿除咗做過立法會議員，由80年代開始就喺荃灣做區議員，到2011年落敗先冇再做。成本天書分成七個章節，由當選到履新期間，至區會日常工作、點同居民打交道、點樣跟進街坊各種奇難雜症、以至拆解港共喺地區網絡等等包羅萬有。
天書提到區議員有幾樣嘢係唔做得，例如唔好牽涉金錢糾紛、唔好因為人哋中傷而發嬲、唔好亂作承諾、唔好喺自己區內搞商業項目、唔好喺議辦做私人嘢、唔好自己一個返大陸、同埋唔好同內地官員同埋中資背景人士接觸。
身在加拿大嘅大嚿同八方講，寫呢本天書係因為民主派喺區選大勝後，唔少人都叫佢返香港教吓啲新人，佢返唔到嚟之餘亦教唔到咁多個，於是佢就搵咗以前嘅職員幫手，花一個星期寫起天書。佢仲話呢次區選結果都出乎佢意料，佢希望一眾新人都謹記，做區議員一定要落區同埋建立好同街坊嘅關係，講到尾，佢做到咁多年區議員有部份係運，有一半就係靠勤力同地區工作。