上月俾熱刺炒魷嘅普捷天奴，近日返咗阿根廷探親，接受訪問話自己想返歐洲教波，仲好開放咁聽吓任何球會送上有趣嘅計劃。有傳肥普下站好有可能係取代蘇斯克查成為曼聯領隊，一心等蘇B被落鑊再頂上。另外，喺熱刺不受新領隊摩連奴重用嘅基斯甸艾歷臣，有傳佢最終堅持決定唔同球會續約，隨時可以跟埋肥普去紅魔。
普捷天奴近日返咗阿根廷，仲去去拜訪母會紐維爾舊生，佢接受訪問強調自己今次返阿根廷只係探親，十幾日後就會返歐洲，佢仲話自己想返歐洲教波：「我知有唔少球會同有趣嘅計劃等緊我，我嘅意願都係想返歐洲教波。畀啲時間我冷靜吓，我要保持自己頭腦清晰，尤其之前同熱刺共度咗五年半嘅時間，我嘅目標係重建自己嘅能力，搵番動力，我仲未有時間去消化近排發生嘅事。」
槍手拜仁都想撬
肥普的確唔愁冇波教，早前傳過炒咗艾馬利嘅阿仙奴同拜仁慕尼黑都想搵佢執教，不過有指佢始終想留喺英超發展，下一站最大可能係由早兩年已經盛傳想斟佢嘅曼聯。今季曼聯同樣開季表現唔好，喺蘇斯克查領軍下，更錄得歷年最差開局。加上英超最近嘅換帥潮，蘇B隨時烏紗不保。有傳，大熱接任人就係喺度虎視眈眈嘅普捷天奴，能唔能夠閃電回歸英超就要睇吓曼聯管理層對蘇B嘅忍耐力。
假如普捷天奴一月教曼聯，佢都要有啲籌碼喺手先可以有信心帶到紅魔起死回生。不過佢兩個昔日愛將哈利卡尼同迪利阿里同摩佬關係咁好就好難帶得走，所以佢好有可能會帶埋喺熱刺不受重用嘅艾歷臣過紅魔。
艾歷臣半價酬賓
摩佬做咗熱刺領隊後，安排阿里打攻擊中場，令到艾歷臣只可以做後備。有報道指，下年六月就同熱刺完約嘅艾歷臣，已經決定唔同球會續約，熱刺主席利維就希望喺1月轉會窗重開時以4,000萬鎊（約4億港元）放售呢位27歲嘅中場，免得球會喺六月完約時人財兩失。曼聯今夏曾經以8,000萬求購艾歷臣無果，家陣平一半，一月佢哋好可能再次出手，等佢可以同肥普喺紅魔拍住上。