「兵變」後七國咁亂嘅拿玻里，喺各項賽事加埋已經有成八場波未贏過，有消息指教練安察洛堤喺下個星期嘅歐聯分組賽對亨克之後，就會落鑊被炒，而教過AC米蘭、兼喺「肥安」麾下踢過波嘅嘅加度素，就被傳係接替拿玻里帥位嘅大熱門人選。安察洛堤上季接任後，帶領拿玻里攞到意甲亞軍，但今季暫時就跌到第七位。其實拿玻里呢場內亂，好大程度上都係因為班主迪羅倫迪斯早排強迫球員集訓，唔畀佢哋返屋企，結果搞到球員怨聲載道，迪羅倫迪斯唔止冇好好反省，仲向反抗嘅球員罰25%月薪，阿倫盧利奧仲因為同佢個仔衝突要罰多一倍人工㖭，所以如果佢唔改變一下態度，換帥都好難救番隊波。