鄭姓港官倫敦仆街，銷聲匿跡兩星期，大家正以為她借傷納福放大假，天天坐在麗池酒店嘆下午茶，把自己養得肥肥白白，怎麼居然以這種衫長褲短魂魄唔齊的狼狽姿態亮相？坐擁豐厚肉身的她，平日雖然扮極唔靚，但愛美初衷毋忘，總不至於蓬頭垢面跑出來釋放強烈大媽氣味，明眼人一睇，就估到失聯期間肯定有不尋常遭遇。咦咦，莫非「身體嚴重受傷」是真的？不過既然負責調查的英京差館兩度明確表示，此嫗傷勢is just not serious，跣腳應該吉人天相，當事人現在大方供出被駐英中國大使館安排回國，秘密送到北京，咁會唔會甩骹脫臼等等言之鑿鑿的症狀，其實都是後加的？別怪我杯弓蛇影，這幾個月新屋嶺和其他扣留所傳出的恐怖故事太多了，勿講話打斷手腳，連雞姦輪姦也甚囂塵上，哎呀陰功豬，熱愛過頭笠樽領的「甩骹主」話晒都係港胞，和林鄭還有同姓之誼，血濃於水啊，一定要查個水落石出，公開她這十幾天的所有行蹤。
揚言必須靜養一年，我們這些舊社會影迷聽見更禁不住疑神疑鬼，上世紀影壇一宗未經fact check的傳聞突然借屍還魂：當紅女星無端端宣佈暫別觀眾九個月，遠離瘋狂人群飛到美國進修學業，對人類繁殖學稍有認識的八卦精於是交頭接耳，單方面散播珠胎暗結喜訊，甚至經手人係邊個都實牙實齒。當然，鄭某年過六十，身懷六甲機會偏低（呃，不熟成語的年輕人千祈咪誤會，「身懷六甲」唔係指年年考第一啊吓），但如今醫學昌明，老蚌生珠見怪不怪，本着嚴肅學術研究精神，絕對不應該輕率排除其可能性。