情侶夫妻間最常見的問題，就是對方「偷食」，董敏莉（Monie）跟律師老公莊耀金拍拖以來，老公曾有不少女士埋身，幸好他懂落閘力抗誘惑，Monie明白若另一半要出軌絕不會輕易露出馬腳，因此她寧願選擇相信對方，總好過終日疑神疑鬼。而Monie跟老公堅持每天一定要攬攬錫錫，從不吝嗇努力保鮮感情。
現年39歲的董敏莉早前拍攝ViuTV劇集《假設性無罪》，劇中Monie跟梁漢文飾演夫婦，但男方搭上老婆好姊妹，自己跟男同事搞曖昧。現實中Monie跟律師老公莊耀金結婚三年，育有一女Martha，幸福美滿。
老公認有女埋身
Monie早前接受《蘋果》訪問，問到拍拖至結婚五年多，有否懷疑過老公？Monie說：「我之前睇ViuTV嘅《婚內情》同拍緊《假》劇時，因投入咗疑心係會重咗，但過咗我又冇。」從不「檢查」老公手機？Monie笑說：「我哋可以睇對方電話，有時都有一刻想睇吓WhatsApp，但其實如果對方要呃你唔會咁易發覺，所以冇必要咁做，我唔會令自己喺呢啲糾結嘅情緒中。」
老公直認曾有女埋身，但Monie卻感自豪：「我知佢有人主動埋身，佢識落閘。多人approach我老公，證明我眼光好。」若老公真的偷食，選擇原諒還是分開？Monie謂：「真係唔知當下會點做，但如果揀咗原諒就要徹底，唔好口話原諒，但心唔係，原諒唔到就分開，心中條刺拔唔走，只會令問題越嚟越大。」
自動匯報行蹤
Monie一直調節心態信任老公：「如果同一個人一齊但唔信任，咁辛苦，不如唔好一齊。至於老公，可能我畀到佢安全感。」Monie跟老公會自動向對方「匯報」行蹤，不是不信任，而是基本尊重。如何保鮮感情？Monie大方分享：「要成日攬攬錫錫，呢啲行為係喜歡對方先做，簡單又唔使錢，我成日都要錫。」當然感情亦有高低時，Monie坦承拍拖時亦曾瀕臨分手：「梗有嗌交，但我嬲完好快原諒，我會諗如果嗌交嬲咗對方，但突然對方有乜意外再見唔到佢，咁係咪仲要嬲？我只要一咁諗就唔會嬲。」
撰文：寶妮
攝影：仇志德
場地提供：BAKEBE
服裝：Beyourstyleland