八方前日引述政圈好事之徒話，中共一向做事手法係，你越話邊個官要下台，佢就偏唔畀佢下台，果然盛傳「燉冬菇」嘅中聯辦主任王志民（圖），噚日現身北京出席官方活動，仲見埋記者發表講話，暗示自己唔會俾人調走。
聲稱繼續執行習任務
王志民噚日喺北京出席紀念澳門基本法20周年座談會後，呢啲座談會一向就係等記者報道領導講話，與會者即使俾記者捉到亦唔會多講嘢，但王志民就喺會場外肯接受訪問，佢仲話要「很堅定地告訴我們香港的朋友，我本人會和中聯辦的領導班子和全體同事，繼續堅決貫徹習近平總書記（對香港）的重要講話精神」，仲話「一定會繼續忠實地履行中央賦予我們在香港的重要職能」，言下之意，就係話畀人聽，佢唔會調走，你班香港人唔好幻想喇。
不過咁講，王志民噚日的確唔會調走，但今日、聽日會唔會調走呢？呢個難講，睇吓中共點處置老董、689，佢哋當年作為特首，中共可以今日全力撐、聽日叫你執包袱，完全反面不認人，對香港特首尚且如此，何況係對一個中聯辦主任、中共黨員嘅王志民，隨時當棄卒連解釋都唔使呢！