美國條《香港人權與民主法案》正式生效，一眾香港人都買定花生等美方公佈制裁名單，睇吓有幾多人會榮歸大灣區。呢個時候「香江第一才子」陶傑率先爆料，話有個親共香港富商坐私人飛機去美國嘅時候被拒入境，全城於是一齊估領袖，想知究竟係邊個咁快有報應。
八方都有問過政商界老友，大家齊齊向陶傑朋友圈打聽，但佢就嚟個反高潮，同《蘋果》澄清消息來源其實係田北辰，自己都係引述對方電台訪問所講嘅嘢，原來係嚟自上個月29號港台嘅《自由風自由Phone》，八方聽返就發現，有富商被拒入境美國一事原來只係一場虛驚（喜）。
田二少：糟質咗三個鐘先入到
當日田北辰喺節目話自己係全國人大代表，一早就有心理準備會被拒入境，所以呢幾年都無去美國，跟住就爆咗一位朋友嘅經歷：「我最近有朋友，笑死我，自己有私人飛機，唔係從事任何政治工作，話呢排入境被人糟質咗三個鐘頭」，主持人當時都追問故事結尾：「俾人問咗好耐先入到境？」田北辰確認係入境成功，但就話「隨時唔畀你入，咪揸返架機走囉！」
才子今次誤放流料，但相信都令嗰班打壓香港人權同民主不遺餘力嘅保皇黨同親共派有排震，試問佢哋又有邊個敢保證自己唔喺黑名單入面先？而最弊嘅唔係冇得去美國，而係喺當地啲資產，隨時呢個冬天就被凍結冰封呀！
李八方