貿易戰、人權法爭議……過去中美僅是資本主義與社會主義之爭，但國際關係學者沈旭暉接受本報訪問時指，對比過去，中國現已高度資本化，中美展開的是另一場新冷戰：威權主義與自由主義之爭。至於香港的角色，過去數十年一直擔任中美之間的窗口，而香港這個在金融及經濟上非常重要的窗口，在社會運動後或會被中國封上，並由內地不同城市切割取代香港的不同功能。
記者：孫樂祈
中國由改革開放至今，共產色彩已褪下，但集權結構未改，中西方價值觀的矛盾，因科技發展加劇。雖然中英雙方約定做生意，但沈旭暉形容緊張程度已達冷戰級別，「中美兩國民間互相捐錢，在十年前好平常。但上年董生的中美交流基金會捐錢去德州大學被拒絕；收美國捐錢的NGO，例如Carter Center，如今都超敏感。」
港功能或被切割取代
中西方陣營自由主義與威權主義矛盾升溫，源自對Big data、AI的運用，「西方用嚟取締人類重複性工作，人唔需要工作就有基本收入，工作就變成發揮創造力，重視的是人類的自由。但中國就用作將人化作可控、可規劃的零件，呢啲係香港人覺得好難頂嘅數字管理，每日都有數字喺個頭上。要犧牲民主、人權、自由、多元主義，好似西藏、新疆，換取效率、安全、大一統。」
然而，全球化下，中美之間不會重回昔日美蘇時期，完全閉關自守的程度，但會充滿磨擦，「好似NBA咁，繼續做生意，但時常要因為政治事件跪低，唔跪、過份跪，都會面對好強政治後果。」
兩大勢力陣營角力，香港以往在英國治下，扮演窗口的角色左右逢源，但今次香港的重要性將被削減，「上海、深圳都取代唔到香港，現時就吹緊澳門，每一個散件都無可能取代香港。但內地現時退而想將每一個散件，取代不同部位的香港，這樣長遠會否可以唔要香港呢？」沈旭暉有點悲觀，「香港就好似宜興的紫砂茶壺，有漬才珍貴，現時有班人想洗走晒，咁將香港變成一個普通城市，仲有咩價值。」
今浪是守護世界文明
沈旭暉指亦有外國人支持中國價值，「有住在上海的外國人，覺得安全，夜晚唔怕俾人打劫，反而去法國、西班牙會驚。」作為過客或許不錯，但作為一個城市的公民，卻是一輩子受到24小時全方位監控，成為一粒被規劃的零件。沈旭暉指好多外國人若非NBA事件，都不會關注香港問題，他近月犧牲親子生活，接連到多國出席論壇，就是為帶動外國關注香港，「香港今次反送中浪潮，其實係守護緊世界文明，幫緊西方攔住中國將依套價值輸出，世界係應該支持香港。」